عبدالحئی کاکڑ بی بی سی اردوڈاٹ کام، پشاور

	فاٹا سے تعلق رکھنے والے بیس میں انیس اراکین نے بائیکاٹ کیا ہے

قبائلی علاقے خیبر ایجنسی سے تعلق رکھنے والے رکن پارلیمنٹ سنیٹر حمیداللہ جان نے بی بی سی سے بات چیت کرتے ہوئےدعویٰ کیا کہ فاٹا سے تعلق رکھنے والے قومی اسمبلی اور سینٹ کے تقریباً بیس میں سے اٹھارہ اراکین نے احتجاجاً بائیکاٹ کیا۔ ان کا کہنا تھا کہ اورکزئی ایجنسی سے تعلق رکھنے والے وفاقی وزیر جی جے جمال بطور وفاقی وزیر جرگے میں شرکت کی ہے۔

یہ پہلی مرتبہ ہے کہ قبائلی علاقے سے تعلق رکھنے والے اراکین اسمبلی نے ایک ایسے قبائلی جرگے میں شرکت کرنے سے انکار کیا جس میں پاکستان کے فوجی صدر جنرل پرویز مشرف شریک تھے۔ مبصرین اس سے ایک غیر معمولی واقعہ قرار دے رہے ہیں۔

سنیٹر حمیداللہ جان کا کہنا تھا کہ مرکزی حکومت قبائلی علاقوں کے امن و امان، ترقیاتی منصوبوں اور مستقبل سے متعلق حکمت عملی وضع کرنے کے سلسلے میں فاٹا کے منتخب اراکین پارلیمنٹ کو اعتماد میں نہیں لے رہی ہے اور اسی لیے انہوں نے جرگے کا احتجاجاً بائیکاٹ کیا۔

ان کا مزید کہنا تھا کہ ’حکومت قبائلیوں کو بھیڑ بکریاں سمجھ رہی ہے اور اتنی زحمت بھی نہیں کرتی ہے کہ قبائلی علاقوں سے متعلق ہونے والے فیصلوں میں منتخب اراکین اسمبلی سے مشاورت کی جائے‘۔سنیٹر حمیداللہ جان نےگورنر ہاؤس پشاور میں ہونے والے قبائلی جرگے کو ایک دکھاوا قرار دیا۔

جرگے کا بائیکاٹ کرنے والے شمالی وزیرستان کے چیف آف وزیر ملک نصراللہ نے بی بی سی کو بتایا کہ ’حکومت نے چند عرصے قبل معاہدے کی خلاف ورزی کرتے ہوئے انہیں اعتماد میں لیے بغیر شمالی وزیرستان میں آپریشن کیا تھا جس پر امن کمیٹی کے تمام ارکان نے احتجاجاً استعفی دیا تھا اور ہم نےجرگے میں بھی اسی وجہ سے شرکت نہیں کی‘۔