ریاض سہیل بی بی سی اردو ڈاٹ کام، کراچی

	مختلف اندازوں کے مطابق ہلاک ہونے والوں کی کل تعداد دو سو سے زائد ہے

ایدھی کے سرد خانے میں موجود چالیس لاشوں کی تاحال شناخت نہیں ہوسکی ہے۔

ایدھی کے عملدار انور کاظمی نے بی بی سی کو بتایا کہ لاشوں کی حالت بہت خراب ہے اور ان کے جسموں پر لگے زخم کی وجہ سے ان سے تعفن اٹھ رہا ہے۔

ان کا کہنا تھا کہ شام تک ان کی تدفین کردی جائےگی کیونکہ ان لاشوں کو مزید نہیں رکھا جاسکتا۔

انہوں نے بتایا کہ ہلاک ہونے والوں میں اکثریت بڑی عمر کے لوگوں کی ہے۔ ان کے پاس اس سے پہلے اتنی تعداد میں لاشیں نہیں آئی ہیں اور وہ یہ سمجھتے ہیں کہ یہ ہلاکتیں بارش اور اس کے نتیجے میں ہونے والی تباہ کاریوں کی وجہ سے ہوئی ہیں۔

انور کاظمی نے بتایا کہ انہیں تمام لاشیں ہسپتالوں اور پولیس کے ذریعے ملیں۔

	سائن بورڈ گرنے سے ہلاکتوں کے بعد حکومت نے بڑے سائن بورڈ ہٹانے کا فیصلہ کیا ہے

کراچی الیکٹرک سپلائی کارپوریشن کے ترجمان سید سلطان احمد نے احتجاج کی اطلاعات کو رد کرتے ہوئے بتایا کہ نوے فیصد علاقوں میں بجلی بحال کی جاچکی ہے۔ تاہم ایسے علاقے جہاں کھمبے گرگئے ہیں، وہاں کام جاری ہے کیونکہ کھمبوں کی دوبارہ تنصیب میں چوبیس گھنٹے لگتے ہیں۔

کراچی واٹر بورڈ کے ترجمان قدیر احمد صدیقی کا کہنا ہے کہ پیر کی صبح تک صورتحال میں بہتری آئی ہے۔ شہر میں پانچ سو پانچ ملین گیلن پانی فراہم کیا جاتا ہے۔

انہوں نے بتایا کہ بارش کے بعد سے گزشتہ شب تک بجلی کے بریک ڈاؤن کی وجہ سے حب اور گھارو کے پلانٹس سے پانی کی فراہمی بند ہوگئی تھی جس کے باعث گلبرگ، نارتھ ناظم آباد، جمشید ٹاؤن، لیاقت آباد ٹاؤن، کیماڑی ٹاؤن، اورنگی، بلدیہ اور سائٹ کے علاقوں میں پانی کی فراہمی ممکن نہیں ہو سکی۔

	سندھ اور بلوچستان کے ساحلی علاقوں میں گرج چمک کیساتھ بارش کا امکان ہے

دوسری جانب محکمہ موسمیات کا کہنا ہے آئندہ چوبیس گھنٹوں میں کراچی سمیت سندھ اور بلوچستان کے ساحلی علاقوں میں گرج چمک کے ساتھ درمیانے درجے کی بارش کا امکان ہے۔ ان کا کہنا تھا کہ بارش کے دوران تیس ناٹس فی گھنٹے کی رفتار سے ہوائیں بھی چلیں گی اور ان کی رفتار میں اضافہ بھی ممکن ہے۔

محکمہ موسمیات کراچی کے ماہر نعیم شاہ کا کہنا تھا کہ ہواؤں میں تیزی کی وجہ سے سمندر میں تین فٹ تک کی لہریں اٹھیں گی اس لیے ماہی گیروں کو سمندر میں جانے سے روکا گیا ہے۔

دوسری طرف سنیچر کو طوفان سے سب سے زیادہ نقصان گڈاپ ٹاؤن میں ہوا جس کے ناظم مرتضی بلوچ نے بتایا کہ وہاں کل بائیس لوگ ہلاک ہوئے ہیں اور ایک ہزار گھروں کی چھتیں یا دیواریں گری ہیں۔ مختلف اندازوں کے مطابق کراچی میں ہلاک ہونے والوں کی کل تعداد دو سو سے زائد ہے۔

مرتضیٰ بلوچ نے بی بی سی سے بات کرتے ہوئے کہا کہ انہوں نے خیموں کا بندوبست کیا ہے لیکن کوئی وہاں آنے کو تیار نہیں۔ انہوں نے کہا پورے گڈاپ ٹاؤن میں بجلی بند ہے جس کی وجہ سے ٹیوب ویل بھی بند ہیں جس سے پینے کا پانی نہیں مِل رہا۔ انہوں نے کہا کہ تقریباً بیس کروڑ کا نقصان ہو چکا ہے۔

انہوں نے کہا کہ گورنر سندھ نے بتایا تھا کہ ان کے علاقے میں مدد بھیجی جائے گی لیکن ایسا کچھ نہیں ہوا۔

سمندری طوفان نے سندھ کے ساحلی علاقوں میں بھی نقصان پہنچایا ہے جہاں بڑی تعداد میں کچے مکانات اور پولٹری فارم تباہ ہو گئے ہیں اور کچھ اموات کی بھی اطلاعات ہیں۔

سنیچر کو ساٹھ ناٹس فی گھنٹہ کی رفتار سے چلنے والے طوفان نے ٹھٹہ کے ساحلی علاقوں کیٹی بندر اور کھارو چھان میں ماہی گیروں کے کچے گھر تباہ کردیے۔

	سنیچر کو طوفان سے سب سے زیادہ نقصان گڈاپ ٹاؤن میں ہوا ہے

ساحلی علاقوں میں پچاس فیصد کچے مکانات گرچکے ہیں، کئی کشتیاں ٹوٹ گئیی ہیں اور ماہی گیروں کے جال سمندر میں بہہ گئے ہیں۔

ساحلی علاقوں میں بڑی تعداد میں پولٹری فارم اور پان کے باغات ہیں جن کو بھی نقصان پہنچا ہے۔

شہروں سے دور چھوٹے جزیروں میں رہنے والے ماہی گیروں کا رابطہ شہر سے منقطع ہوگیا ہے اور کھانے پینے کی اشیاء کی قلت ہو گئی ہے۔

واضح رہے کہ انیس سو نانوے میں ساحلی علاقوں میں آنے وانے طوفان نے شدید تباہی پھیلائی تھی۔ حکومت کی جانب سے ریلیف کے لیے تاحال کوئی کارروائی نہیں کی گئی ہے۔

دوسری جانب سندھ کے ریلیف کمشنر انوار حیدر کا کہنا ہے کہ کراچی میں بارش میں ہلاک ہونے والوں کے ورثاء کو معاوضہ دیا جائےگا۔ انہوں نے بتایا کہ شہری حکومت کی جانب سے اڑسٹھ ہلاکتوں کی تصدیق ہوئی ہے تاہم ابھی سروے جاری ہے جو جیسے ہی مکمل ہوگا، متاثرہ خاندان کے کفیل کو ایک لاکھ روپے اور باقی کو پچاس ہزار روپے معاوضہ دیا جائےگا۔ گرنے والے مکانات کا معاوضہ دینے پر بھی غور کیا جاسکتا ہے۔