دلاور خان وزیر بی بی سی اردو ڈاٹ کام، ڈیرہ اسماعیل خان

	گزشتہ دنوں دتہ خیل میں ایک بم دھماکے میں چونتیس افراد ہلاک ہوگئے تھے

مقامی پولیٹیکل انتظامیہ کے ذرائع نے بی بی سی کو بتایا کہ شمالی وزیرستان کی تحصیل میرعلی میں سنچر کی صبح آٹھ بجے کے قریب سکاؤٹس فورس کی ایک گاڑی علاقے میں گشت کر رہی تھی کہ وہ کرم کوٹ میں میرعلی۔ میرانشاہ کی مرکزی شاہراہ پر ایک بارودی سرنگ سے ٹکرا گئی جس کے بعد دھماکے سے سکاؤٹس فورس کے تین اہلکار ہلاک جبکہ دو شدید زخمی ہوگئے۔ زخمیوں کو آرمی ہسپتال بنوں منتقل کردیا گیا ہے۔

پولیٹیکل انتظامیہ کے مطابق دھماکے میں گاڑی مکمل طور تباہ ہوگئی۔

بارودی سرنگ کے دھماکے میں ہلاک ہونے والوں میں حمیدعلی، تنویر احمد اور سیعد خان جبکہ زخمیوں میں حلال احمد اور زاہد مسعود شامل ہیں۔

یہ واقعہ شمالی وزیرستان کے علاقہ دتہ خیل میں بم دھماکے کے ایک اور واقعے کے تین دن بعد پیش آیا ہے جس میں چونتیس افراد ہلاک ہوگئے تھے۔

اس سے قبل مقامی طالبان نے کہا تھا کہ حکومت کی جانب سے ایسے اشارے ملے رہے ہیں جس کی وجہ سے امن معاہدہ ٹوٹنے کے قریب ہے لیکن امن معاہدہ ٹوٹنے کا ابھی تک باقاعدہ اعلان نہیں ہوا ہے۔