ہارون رشید بی بی سی اردو ڈاٹ کام، پشاور

	ازبک پوزیشنوں پر توپ خانے سے گولہ باری بھی کی گئی

84 ازبکوں سمیت 110 افراد ہلاک

تاہم پاکستان فوجی کے ترجمان میجر جنرل وحید ارشد کا کہنا تھا کہ ان کے پاس جنگ بندی سے متعلق ابھی کوئی اطلاع نہیں ہے۔

مصالحت کی غرض سے جنوبی وزیرستان کے صدر مقام وانا جانے والے جمعیت علمائے اسلام کے ایک جرگے کے رکن نیاز احمد قریشی نے بی بی سی کو بتایا کہ یہ جنگ بندی شمالی اور جنوبی وزیرستان کے قبائلی عمائدین کی کوششوں سے ہوئی ہے۔

ایک سوال کے جواب میں انہوں نے وانا سے بتایا کہ یہ جنگ بندی جرگے کے حتمی فیصلے پر پہنچنے تک جاری رہے گی۔

تاہم ادھر وانا سے موصول اطلاعات کے مطابق جمعرات کی دوپہر تک مسلسل چوتھے روز بھی مقامی قبائلیوں اور غیرملکیوں کے درمیان اکا دکا مقامات پر جھڑپیں جاری رہیں۔ البتہ مقامی لوگوں کے مطابق گولہ باری میں اب کافی کمی آئی ہے۔

سرکاری اہلکار اب تک کی لڑائی میں مرنے والوں کی تعداد ایک سو دس سے زائد بتا رہے ہیں جن میں ان کے بقول اکثریت غیرملکیوں کی ہے۔ تاہم وانا کے ایک رہائشی کا کہنا تھا کہ یہ تعداد حقائق سے کافی زیادہ بتائی جا رہی ہے۔

وزیر داخلہ آفتاب احمد خان شیرپاؤ نے کل رات گئے بی بی سی کو تازہ تعداد بتاتے ہوئے کہا تھا کہ تراسی غیرملکیوں کو پکڑا بھی گیا تھا۔

جمعرات کو ایک تازہ واقعے میں ایک گاڑی پر فائرنگ کے نتیجے میں چار غیرملکیوں سمیت چھ افراد کے ہلاک ہونے کی خبر ہے۔ اطلاعات کے مطابق مقامی قبائلیوں نے غیرملکیوں کو چاروں طرف سے محاصرے میں لے رکھا ہے۔

پہلی جنگ بندی زیادہ نہ چلی  اس سے قبل اس ماہ کے اوائل میں بھی فریقین کے درمیان لڑائی کے بعد جنگ بندی ہوگئی تھی جو زیادہ عرصے نہ چل سکی

مقامی شدت پسندوں کے سربراہ مولوی نذیر کا کہنا ہے کہ غیرملکیوں کو مکمل طور پر غیرمسلح ہونے کے بعد پرامن زندگی گزارنے کے لیئے افغان پناہ گزینوں کی طرح کسی دوسرے مقام پر متبادل جگہ فراہم کی جا سکتی ہے۔

یہ جھڑپیں پیر کو صدر مقام وانا کے مغرب میں اعظم ورسک، شین ورسک، ژاغونڈئی اور کلوشہ کے مقامات پر شروع ہوئیں تھی۔

جنگ بندی کی کوششوں کے لیے جنوبی وزیرستان کے علاوہ شمالی وزیرستان سے بھی سینکڑوں کی تعداد میں عمائدین وانا پہنچے تھے۔ ان میں جے یو آئی کے رکن قومی اسمبلی مولانا معراج الدین، مولانا عبدالمالک کے علاوہ محسود جنگجوؤں کے سربراہ بیت اللہ بھی شامل بتائے جاتے ہیں۔

اس سے قبل اس ماہ کے اوائل میں بھی فریقین کے درمیان لڑائی کے بعد جنگ بندی ہوگئی تھی جو زیادہ عرصے نہ چل سکی۔ ابھی واضع نہیں کہ نئی جنگ بندی پر اتفاق ہونے کے بعد یہ کتنی موثر ثابت ہوگی۔