عبدالحئی کاکڑ بی بی سی اردو ڈاٹ کام ،پشاور

	شمالی وزیرستان میں ٹارکٹ کلنگ اور جاسوسی کے الزام میں لوگوں کے قتل کر نے کا سلسلہ جاری ہے۔

شمالی وزرستان سے موصول اطلاعات کے مطابق مقامی لوگوں کو پیر کی رات افغانستان کی سرحد کے قریب سیدگئی علاقے میں نالے کے پاس ایک شخص کی سر کٹی لاش ملی تھی۔لاش کے پاس اردو زبان میں ایک خط بھی ملا ہے جس میں دعوی کیا گیا ہے کہ مقتول امریکہ کے لیے جاسوسی کرتا تھا۔

خط میں خبر دار کیا گیا ہے کہ ’ امریکہ کے لئے جاسوسی کر نے والوں کا انجام یہی ہوگا‘۔ خط میں اس شخص کا نام نیک عمل بتایا گیا ہے جس کا تعلق افغانستان کے مشرقی صوبہ خوست کے زوزک گاؤں سے ہے۔

حکام نے میران شاہ کی ٹاؤن کمیٹی میں لاش شناخت کے لیے رکھ دی تھی جو اطلاعات کے مطابق نصف شب کو چند نامعلوم افراد اپنے ساتھ لے گئے تھے۔

دو ہفتے قبل بھی شمالی وزیرستان کے مبارک شاہی گاؤں کے قریب دو افراد کو جاسوسی کے الزام میں قتل کیا گیا تھا۔واقعہ کی ذمہ داری کسی نے قبول نہیں کی ہے۔

واضح رہے جنوبی اور شمالی وزیرستان میں گزشہ تین سال کے دوران درجنوں افراد کو جاسوسی کے الزام میں قتل کیا گیا ہے جس کی ذمہ داری علاقہ میں سرگرم مبینہ شدت پسندوں پر لگائی جاتی رہی ہے۔

حکومت اور مقامی طالبان کے درمیان گز شتہ سال پانچ ستمبر کو ایک امن معاہدہ ہوا تھا لیکن اس کے باوجود شمالی وزیرستان میں ٹارگٹ کلنگ اور جاسوسی کے الزام میں لوگوں کے قتل کر نے کا سلسلہ جاری ہے۔