خالد عباس سیف فیصل آباد

	فیصل آباد کے علاوہ پنڈی بھٹیاں اور چکوال میں بھی گرفتاریاں ہوئی ہیں

یہ کنونشن سولہ جون کو منعقد ہو گا اور اس میں پنجاب ہائی کورٹ لاہور اور آزاد کشمیر ہائی کورٹ کے جج صاحبان کو بھی شرکت کی دعوت دی گئی ہے۔

گرفتاریوں کے باوجود ضلعی انتظامیہ کا کہنا ہے کہ وہ کنونشن کے انتظامات کو بہتر بنانے میں مدد دے رہی ہے اور کسی قسم کے روڑے نہیں اٹکا رہی۔

ڈسٹرکٹ بار ایسوسی ایشن فیصل آباد کے صدر چوہدری تنویر الرحمٰن رندھاوا نے بتایا کہ چیف جسٹس افتخار محمد چوہدری کا قافلہ ساڑھے آٹھ بجے صبح اسلام آباد سے موٹروے کے راستے روانہ ہوگا۔ چیف جسٹس راستہ میں چکوال، پنڈی بھٹیاں اور چنیوٹ کے وکلاء سے بھی خطاب کریں گے۔

تنویر الرحمٰن رندھاوا کے مطابق فیصل آباد میں وکلاء کنونشن کے انتظامات مکمل ہیں جس میں ملک بھر سے بار ایسوسی ایشنز کے عہدیداروں کو مدعو کیا گیا ہے۔ ہائی کورٹ لاہور اور آزاد کشمیر ہائی کورٹ کے جج صاحبان کو بطور خاص مدعو کیا گیا ہے۔

	چیف جسٹس کے استقبال کے لیے تمام وکلاء متحد ہیں

تنویر رندھاوا نے کہا کہ چیف جسٹس کے استقبال کے لیے تمام وکلاء متحد ہیں اور ان میں کوئی اختلاف نہیں ہے۔ انہوں نے کہا کہ فیصل آباد کے وکلاء ایک سو اٹھارہ دنوں سے فیصل آباد میں ہائی کورٹ کے بنچ کے لیے تحریک چلا رہے ہیں۔ وکلاء نے بھوک ہڑتالی کیمپ بھی قائم کر رکھا ہے جس میں شہر کے تمام سیاسی، صحافتی اور سماجی اداروں کے کارکنوں نے بھی شرکت کی ہے۔

فیصل آباد میں ہائی کورٹ کے بنچ کے قیام سے تقریباً دو کروڑ آبادی کو انصاف کی سہولت ملے گی۔

تنویر رندھاوا کو امید ہے کہ ہائی کورٹ کے بنچ کے قیام کا فیصلہ تیس جون سے پہلے ہو جائے گا۔ اگر اعلان نہیں ہوتا تو تحریک اور احتجاج جاری رہے گا۔

پاکستان مسلم لیگ (ن) کے سابق ایم این اے اور سابق وزیر اعظم نواز شریف کے قریبی عزیز چوہدری شیر علی نے کہا کہ گرفتاریاں کارکنوں کو والہانہ استقبال سے نہیں روک سکتیں۔ انہوں نے کہا کہ جوں جوں تشدد بڑھ رہا ہے حکومت کا یوم حساب قریب آ رہا ہے۔

	ضلعی انتظامیہ کا کہنا ہے کہ وہ کسی قسم کے روڑے نہیں اٹکا رہی

فیصل آباد میں ہفتے بھر کی شدید گرمی کے بعد جمعہ کے روز موسلا دھار بارش ہوئی جس کے بعد درجہ حرارت کم ہو گیا ہے۔ گزشتہ ہفتے کے دوران درجہ حرارت اڑتالیس ڈگری تک پہنچ گیا تھا۔