دلاور خان وزیر بی بی سی اردو ڈاٹ کام، ڈیرہ اسماعیل خان

	ڈاکٹر عبدالرحمان کا کہنا تھا کہ مقامی طالبان نے انہیں تاجوڑی پہنچایا

ڈاکٹر عبدالرحمان کو لکی مروت کے علاقہ تاجوڑی سے اغواء کیا گیا تھا اور جمعرات کو انہیں واپس لکی مروت پہنچا دیا گیا ہے۔

اے ڈی ایچ او ڈاکٹر عبدالرحمان اور میڈیکل سپرنٹنڈنٹ ڈاکٹر محمد اسحاق کو چھبیس مئی دو ہزار چھ کو ڈیوٹی کے دوران تاجوڑی کے علاقے سے دن دہاڑے ایک پولیس چیک پوسٹ کے قریب سے اغواء کیا گیا تھا۔

ڈاکٹر محمد اسحاق کو ابھی تک رہا نہیں کیا گیا کیونکہ بقول ڈاکٹر عبدالرحمان کہ ان پر اغوا کاروں کو شبہ ہے کہ وہ برطانیہ کے ایک ادارے این ایچ او کے لیے کام کرتے ہیں۔

ڈاکٹر عبدالرحمان نے بی بی سی کو بتایا کہ تین ہفتے قبل وہ دونوں اپنے دفتر جا رہے تھے کہ دس مسلح نقاب پوشوں نے انہیں بندوق کی نوک پر اغواء کرلیا۔’فوراً ہماری آنکھوں پر پٹیاں باندھ دی گئیں اور ہمیں گاڑی میں لٹا کر اور ایک نامعلوم مقام پر پہنچا دیا گیا۔وہا ں ہمیں کھانا کھلایا گیا اور بعد میں ایک دوسرے مقام پر منتقل کردیا گیا۔‘

ڈاکٹر عبدالرحمان نے بتایا کہ اغواء کار ان کی تنخواء کے بارے میں پوچھ رہے تھے اور یہ کہ ہم لوگ کس ملک کے لیے کام کر رہے ہیں۔

انہوں نے کہا کہ انہیں علاقے کے مقامی طالبان کی مدد سے رہائی ملی لیکن اغوا کاروں کو ڈاکٹر محمد اسحاق پر شبہ ہے کہ وہ برطانیہ کے ملازم ہیں اس لیے ان کو رہا نہیں کیا گیا۔

ڈاکٹر عبدالرحمان کا کہنا تھا کہ ڈاکٹر اسحاق کو انیس دن تک ان کے ساتھ رکھا گیا لیکن آخری دن ان کو ایک دوسرے کمرے میں منتقل کر دیا گیا۔ انہوں نے کہا کہ اغوا کاروں نے انہیں مسلسل مسلح پہرے میں رکھا۔

انہوں نے کہا کہ جمعرات کو انہیں شمالی وزیرستان کے صدر مقام میرانشاہ منتقل کردیا گیا اور وہاں سے مقامی طالبان نے انہیں تاجوڑی پہنچایا۔ انہوں نے کہا کہ ان کے ساتھ ان کا ڈرائیور بھی تھا اور اسے بھی رہا کر دیاگیا۔

انہوں نے کہا کہ اغواء کار انہیں دو وقت کا کھانا دیتے تھے۔