عبدالحئی کاکڑ بی بی سی اردو ڈاٹ کام ،پشاور

	پولیس کے مطابق بم ایک خالی پلاٹ میں رکھا گیا تھا (فائل فوٹو)

پولیس کا کہنا ہے کہ یہ بم اتوار بازار کے سامنے ایک خالی پلاٹ میں رکھا گیا تھا جس کی اطلاع ملنے پر پولیس نے علاقے کو گھیرے میں لے کر بم سکواڈ ڈسپوزل کی مدد سے اسے ناکارہ بنا دیا۔

لکی مروت کے ایس ایچ او عثمان غنی نے بی بی سی کو بتایا کہ بم اس مقام سے تقریباً ڈیڑھ سو گز کے فاصلے پر رکھا گیا تھا جہاں سنیچر کو ایک میوزک سنٹر کے سامنے ہونے والے دھماکے میں خودکش بمبار ہلاک ہوا تھا۔ ان کے مطابق بم ایک گیس سلنڈر پر رکھاگیا تھا جو تھوڑی سی حرکت دینے سے زودار دھماکے کے ساتھ پھٹ سکتا تھا۔ ان کا کہنا تھاکہ یہ دہشت گردی کی ایک کوشش تھی۔

لکی مروت کا علاقہ پاکستان کے قبائلی علاقوں سے ملحق ہے۔صوبہ سرحد میں پچھلے دنوں بم دھماکوں میں اضافہ ہوا ہے۔

سنیچر کو صوبہ سرحد کے جنوبی شہر ٹانک کے قریب پاکستانی فوجی قافلے پر کیے گئے ایک خود کش بم حملے میں دو فوجی ہلاک جبکہ چھ زخمی ہوگئے تھے۔