ہارون رشید بی بی سی اردو ڈاٹ کام، پشاور

	فوجی قافلہ ڈیرہ اسماعیل خان سے ٹانک جا رہا تھا

حکام کے مطابق ایک نامعلوم خود کش حملہ آور نے بارود سے بھری گاڑی کو دوپہر بارہ بجے کے قریب ٹانک اور ڈیرہ اسماعیل خان کے درمیان باراخیل اڈہ کے علاقے میں فوجی قافلے سے ٹکرا دیا۔

فوجی حکام کا کہنا ہے کہ زخمیوں میں سے ایک کی حالت تشویشناک ہے۔ زخمیوں کو ڈیرہ اسماعیل خان کے کمبائنڈ ملٹری ہسپتال میں داخل کرایا گیا ہے۔

دھماکے میں حملہ آور کی گاڑی مکمل طور پر تباہ ہوگئی۔ تفتیش کار حملہ کے مقام سے ملے ایک انسانی سر کی مدد سے حملہ آور کی شناخت کرنے کی کوشش کر رہے ہیں۔

عینی شاہدین کے مطابق حملہ آور نے اپنی گاڑی کو فوجی قافلے کی قیادت کرنے والی گاڑی سے ٹکرایا۔ فوجی حکام نے خود کش حملے کے بعد علاقے کا محاصرہ کر کے سڑک کو ٹریفک کے لیے بند کر دیا۔

	دھماکے کے بعد پولیس نے سڑک کو بند کر دیا

پاکستانی فوج کے ترجمان میجر جنرل شوکت سلطان نے فوجی قافلے پر حملے کی تصدیق کی ہے۔

اس سے قبل سنیچر کی صبح صوبہ سرحد کے ایک اور شہر لکی مروت میں ایک مبینہ بمبار مصروف بازار میں بم نصب کرتے ہوئے بم پھٹ جانے سے ہلاک ہو گیا تھا۔

ابھی تک کسی نے ان حملوں کی ذمہ داری قبول نہیں کی ہے۔ تاہم ماضی میں حکام اس قسم کے حملوں کا الزام قبائلی علاقوں میں موجود عسکریت پسندوں پر لگاتے رہے ہیں۔