عزیزاللہ خان بی بی سی اردو ڈاٹ کام، کوئٹہ

	گرفتار غیر ملکیوں کی عمریں 22 اور 29 سال کے درمیان بتائی گئی ہیں

پاک ایران سرحد کے قریب واقع شہر تفتان کے تحصیل نائب ناظم جلیل محمدانی نے بتایا ہے کہ قانون نافذ کرنے والے اہلکاروں نے آج تفتان بازار سے تین غیر ملکیوں کو گرفتار کیا ہے۔ ان غیر ملکیوں کا تعلق جرمنی اور وسط ایشیائی ممالک کرغزستان سے بتایا گیا ہے تاہم اس بارے میں تحقیقات کی جا رہی ہیں۔

جلیل محمدانی نے بتایا کہ ان غیر ملکیوں کی عمریں بائیس اور انتیس سال کے درمیان بتائی گئی ہیں اور یہ شبہ بھی ظاہر کیا جا رہا ہے کہ ان افراد کا تعلق القاعدہ سے بھی ہو سکتا ہے۔

تاہم سرکاری سطح پراس حوالے سے کچھ نہیں بتایا جا رہا ہے۔

بلوچستان کا سرحدی شہر تفتان غیر قانونی طور پر یورپ جانے والے لوگوں کے لیے گیٹ وے کی حیثیت رکھتا ہے۔ پاکستان کے علاوہ افغانستان، بنگلہ دیش اور دیگر ممالک کے لوگ اس راستے کو یورپ جانے کے لیے محفوظ راستہ سمجھتے ہیں۔ یہی وجہ ہے کہ آئے روز ایرانی حکام بڑی تعداد میں لوگوں کو گرفتار کر کے پاکستانی حکام کے حوالے کرتے رہتے ہیں۔

پاکستانی حکام کا کہنا ہے کہ سرحد پر کڑی نگرانی کی جا رہی ہے اور غیر قانونی طور یورپ اور خلیجی ممالک جانے والے لوگوں کی تعداد میں کمی واقع ہو رہی ہے۔