عزیزاللہ خان بی بی سی اردو ڈاٹ کام کوئٹہ

	تربت ڈیم کی تعمیر کے خلاف لوگ احتجاج کرتے رہے ہیں

مقامی لوگوں نے بتایا ہے تربت میں میرانی ڈیم کے قریب واقع علاقے سولبند گوڑی ناصر آباد اور خیر آباد سے لوگ محفوظ مقامات کی طرف منتقل ہو رہے ہیں اور ہسپتال میں ایمرجنسی کی صورتحال نافذ کر دی گئی ہے ۔

ضلعی انتظامیہ کے دفتر میں موجود اہلکاروں نے بتایا ہے کہ ڈیم میں پانی کی سطح مسلسل بلند ہو رہی ہے اور چند فٹ کے بعد سپل ویز کھل جائیں گے۔

یاد رہے تربت میں میرانی ڈیم کے متاثرین گزشتہ ایک ماہ سے احتجاجی مظاہرے کر رہے تھے کہ انھیں معاوضہ دیا جائے کیونکہ ڈیم کے قریب جس علاقے میں وہ رہتے ہیں وہاں انہیں شدید خطرہ لاحق ہے۔ ایسی اطلاعات بھی تھیں کہ وفاقی حکومت نے معاوضے کی رقم ضلعی انتظامیہ کو فراہم کی ہوئی ہے لیکن انتظامیہ تاخیری حربے استعمال کر رہی ہے۔

یاد رہے بلوچستان کے ساحلی علاقوں میں حالیہ طوفان سے بڑی تعداد میں کشتیاں غرق ہو گئی ہیں جبکہ سربندر کے علاقے میں تین مکان ایک سکول اور درجن بھر چار دیواریاں پانی میں بہہ گئی ہیں۔ ان ساحلی علاقوں میں طوفان کی شدت میں کمی آئی ہے۔

میرانی ڈیم کا منصوبہ مکران ڈویزن میں زراعت اور پینے کے پانی کی فراہمی کے لیے دو ہزار ایک میں شروع کیا گیا جس پر کوئی چھ ارب روپے لاگت آئی ہے۔