عزیزاللہ خان بی بی سی اردو ڈاٹ کام، کوئٹہ

	گزشتہ سال بی این پی نے گوادر سے کوئٹہ تک لانگ مارچ کیا تھا

کوئٹہ پریس کلب کے سامنے احتجاجی مظاہرے کے فورا بند بلوچستان نیشنل پارٹی کے جنرل سیکرٹری حبیب جالب ایڈووکیٹ ولی کاکڑ، رزاق لانگو اور آغا حسن کو پولیس نے گرفتار کرکے بجلی تھانے پہنچا دیا۔

حبیب جالب ایڈووکیٹ نے کہا کہ یہ سب ان کی جماعت کے کارکنوں کو اشتعال دلانے کے لیے کیا گیا ہے۔

کوئٹہ پریس کلب کے سامنے جماعت کے کارکنوں نے حکومت کے خلاف زبردست نعرہ بازی کی ہے جبکہ قلات میں احتجاجی مظاہرہ پرامن رہا۔

ادھر خضدار میں ایک ہفتے کے اندر یہ دوسرا موقع ہے کہ بلوچستان نیشنل پارٹی کو خضدار میں احتجاجی مظاہرہ نہیں کر نے دیا گیا۔ جماعت کے رہنما اور مستعفی ہونے والے رکن قومی اسمبلی رؤف مینگل نے کہا کہ صوبائی حکومت اور مقامی انتظامیہ نے ان کی جماعت کے لیے تمام جمہوری راستے بند کر دیے ہیں۔

یاد رہے گزشتہ سال نومبر میں بی این پی نے لشکر بلوچستان کے نام سے گوادر سے کوئٹہ تک لانگ مارچ کا اعلان کیا تھا لیکن اس سے پہلے جماعت کے تقریباً تمام مرکزی قائدین کو حراست میں لے لیا گیا تھا۔

اس کے علاوہ تربت میں میرانی ڈیم کے متاثرین کوئی دس روز سے احتجاج کر رہے ہیں۔ ان کا کہنا ہے کہ انھیں ان کے نقصان کی رقم ادا نہیں کی جارہی اور ڈیم کا پانی ان کے گھروں تک پہنچ رہا ہے۔