ہارون رشید بی بی سی اردو ڈاٹ کام، پشاور

	ڈاکٹر ہوپٹمین انیس سو پچاسی سے شاہراہ قراقرم کے ساتھ پائے جانے والے آثارِ قدیمہ پر تحقیق کر رہے ہیں

ہائڈلبرگ اکیڈمی آف سائنسز کے پروفیسر ڈاکٹر ہیرالڈ ہوپٹمین نے پشاور میں بی بی سی سے بات کرتے ہوئے کہا کہ یہ علاقہ اہم ترین آثارِ قدیمہ سے مالا مال ہے۔ ’یہاں پتھروں پر بتیس ہزار قدیم نقش و نگار اور بارہ اقسام کے رسم الخط میں لکھے گئے کتبے موجود ہیں۔ اگر یہ ڈیم موجودہ پلان کے مطابق تعمیر کیا جاتا ہے تو خدشہ ہے کہ ان آثارِ قدیمہ کا اسی فیصد حصہ پانی میں ڈوب جائے گا‘۔

آثارِ قدیمہ کی تصاویر کے لیے یہاں کلک کریں

ڈاکٹر ہیرالڈ نے بتایا کہ آئندہ برس اس ڈیم کی تعمیر کے آغاز اور دو ہزار سولہ میں تکمیل سے شمالی علاقہ جات کے ضلع دیامیر میں پائے جانے والے ان تمام آثارِ قدیمہ کو سنگین خطرہ ہے۔ ان کا کہنا ہے کہ ڈیم کی جھیل بھاشا سے لے کر رائے کوٹ پل تک بتیس دیہات اور ان کے ساتھ آثار قدیمہ مکمل طور پر ڈوب جائیں گے۔

	چھ سو قبل مسیح میں آریاؤں کی یلغار کے بعد شمالی علاقہ جات پہنچنے والے خانہ بدوشوں کی مجسمہ سازی کا ایک نمونہ

جرمن ماہر ڈاکٹر ہیرالڈ انیس سو پچاسی سے شاہراہ قراقرم کے ساتھ پائے جانے والے پتھروں پر قدیم نقش و نگار اور رسم الخط کی تحقیق کے ایک منصوبے پر کام کر رہے ہیں۔ اس منصوبے میں انہیں پاکستان کے معروف ماہر آثار قدیمہ اور تاریخ دان ڈاکٹر احمد حسن دانی کا تعاون بھی حاصل ہے۔

جرمنی کی ہائڈلبرگ اکیڈمی آف سائینسز اینڈ ہومینٹیز نے یہ منصوبہ چھبیس برس قبل شروع کیا تھا۔

ڈاکٹر ہیرالڈ کا کہنا تھا کہ ایسے مقام پر ڈیم کا منصوبہ قابل تشویش ہے کیونکہ شمالی علاقہ جات دنیا بھر میں پتھروں پر پائے جانے والے قدیم نقش و نگار اور مختلف رسم الخط والے کتبوں کا گڑھ ہیں۔ اسی قسم کے نقوش آسٹریلیا اور افریقہ میں بھی ملے ہیں لیکن کسی ایک مقام پر اتنی بڑی تعداد میں یہ صرف پاکستان کے شمالی علاقہ جات میں ہی ہیں۔

’یہ نوادرات اپنی تعداد اور فرق کے اعتبار سے سب سے زیادہ اور مختلف یہیں پائے جاتے ہیں۔ ان کا تعلق آٹھویں صدی قبل از مسیح سے سولہویں صدی میں اسلام کی آمد تک ہے‘۔

نوادرات کا ممکنہ بچاؤ  ڈیم کی تعمیر سے پہلے گلگت یا کسی اور علاقے میں عجائب گھر بنا کر تمام آثارِ قدیمہ کو وہاں منتقل کیا جائے ڈاکٹر ہیرالڈ

جرمن ماہر کا ماننا تھا کہ ڈیم کی تعمیر تو نہیں روکی جاسکتی لیکن بہتر یہ ہوگا کہ اس سے قبل ان آثار قدیمہ کا سروے مکمل کیا جائے اور جتنے ممکن ہوسکیں اتنے پتھر وہاں سے کسی عجائب گھر منتقل کر دیے جائیں۔ یہ عجائب گھر گلگت یا کسی اور مقام پر بنایا جاسکتا ہے۔ تاہم انہوں نے اعتراف کیا کہ بہت کم ایسے پتھر ہیں جن کو وہاں سے کسی اور مقام پر منتقل کیا جاسکتا ہے۔

ڈاکٹر ہیرالڈ نے بتایا کہ وہ جرمنی سے جدید ٹیکنالوجی یہاں لانے کے بارے میں سوچ رہے ہیں تاکہ ان نقوش کی تھری ڈائمنشنل سکینگ اور تصویر کشی کی جاسکے۔ ’اس کے بعد ان نقوش کی ہو باہو ویسی ہی نقل باآسانی تیار کی جاسکتی ہے جس سے مستقبل کی نسلوں کا فائدہ ہوگا‘۔

	چھ سو قبل مسیح میں آریاؤں کی یلغار کے بعد شمالی علاقہ جات پہنچنے والے خانہ بدوشوں کی مجسمہ سازی کا ایک نمونہ

حکومت پاکستان کے ردعمل کے بارے میں ڈاکٹر ہیرالڈ نے بتایا کہ انہوں نے وفاقی سیکرٹری برائے ثقافت جلیل عباس سے اس سلسلے میں اسلام آباد میں ملاقات کی ہے۔ ان کا کہنا تھا کہ حکومت کا ردعمل مثبت تھا۔ ’سیکرٹری صاحب نے بتایا کہ اس منصوبے کے لیئے رقم نہیں بلکہ ماہرین کی کمی اہم مسئلہ ہوگی‘۔

پاکستان کے شمالی علاقہ جات ماضی میں چین اور مشرق وسطیٰ سے رابطے کا اہم ذریعہ رہے ہیں۔ کافی بحث مباحثے اور تنازعات کے بعد صدر جنرل پرویز مشرف نے آخرکار اس ڈیم کا سنگِ بنیاد اس برس کے اوائل میں رکھا تھا۔