ہارون رشید بی بی سی اردو ڈاٹ کام، اسلام آباد

	’ اختیارات کی تقسیم اور عدلیہ کی آزادی‘ کے عنوان سے سیمینار سپریم کورٹ میں منعقد ہوا تھا

یہ بات وزارت داخلہ کے ترجمان نے اسلام آباد میں ایک بریفنگ کے دوران بتائی۔

سپریم کورٹ بار ایسوسی ایشن نے’ اختیارات کی تقسیم اور عدلیہ کی آزادی‘ کے عنوان سے ایک سمینار سپریم کورٹ میں منعقد کیا تھا، جس میں بعض وکلاء کی جانب سے سیاسی نعرہ بازی اور تقاریر ہوئی تھیں۔

حکومت کا کہنا ہے کہ اس نے سپریم کورٹ کو ایک خط لکھا ہے جس میں عدالت کی توجہ اس جانب مبذول کروائی گئی ہے۔ وزارت داخلہ نے یہ خط سپریم کورٹ کے رجسٹرار کو ارسال کیا ہے جس میں قائم مقام چیف جسٹس سے اس خلاف ورزی میں ملوث افراد کے خلاف کارروائی کی درخواست کی ہے۔

وزارت داخلہ کے ترجمان بریگیڈیر (ریٹائرڈ) جاوید اقبال چیمہ کا کہنا تھا کہ انہیں امید ہے کہ عدالت اس معاملے پر غور ضرور کرے گی۔

	حکومت کے مطابق سیمینار میں وکلاء نے حکومت مخالف نعرے لگائے تھے

انہوں نے اس سمینار میں سیاسی تقاریر کی مذمت کرتے ہوئے عدالت سے کارروائی کی استدعا کی۔

ایک سوال کے جواب میں کہ عدالت کی جانب سے کارروائی نہ کرنے کی صورت میں حکومت مزید کن آپشنز پر غور کر رہی ہے، جاوید اقبال چیمہ نے اس بارے میں کچھ کہنے سے انکار کیا۔

سمینار میں بعض وکلاء نے اپنی تقاریر اور نعروں میں صدر اور فوج کو کڑی تنقید کا نشانہ بنایا تھا۔

سمینار کے اگلے روز حکومت کے دو وزراء اور ایک وکیل نے، بقول ان کے، سپریم کورٹ کی عمارت کے تقدس کی پامالی اور ضابطۂ اخلاق کی خلاف ورزی پر احتجاج کرتے ہوئے عدالت سے از خود نوٹس لینے کا مطالبہ کیا تھا۔

لیکن دو روز تک بظاہر کسی ردعمل کے سامنے نہ آنے پر اب حکومت نے یہ خط لکھا ہے۔