دلاور خان وزیر بی بی سی اردو ڈاٹ کام، ڈیرہ اسماعیل خان

	اہلکاروں کی بازیابی کے لیے پولیٹیکل انتظامیہ امن کمیٹی میرانشاہ سے مسلسل رابطے میں تھی (فائل فوٹو)

پولیٹیکل انتظامیہ شمالی وزیرستان کے ایک اہلکار نے بی بی سی کو بتایا کہ بدھ کی صبح قبائلی جرگے نے تمام اہلکاروں کو بنوں سرکٹ ہاؤس پہنچا دیا اور بنوں سے ایک پولیس کی گاڑی میں ان افراد کو پشاور روانہ کردیا گیا ہے۔

تاہم جرگے نے یہ نہیں بتایا کہ اغواء کار کون تھے اور ان افراد کو کس مقصد کے لیے اغواء کیا گیا تھا۔

محکمۂ بہبود آبادی کے اغواء کیے جانے والے اہلکاروں کی بازیابی کے لیے پولیٹیکل انتظامیہ، امن کمیٹی میرانشاہ سے مسلسل رابطے میں تھی۔

امن کمیٹی کے صدر گل رنضان نے بتایا تھا کہ مغویان محفوظ ہیں اور جلد رہا ہوجائیں گے اور انہیں کوئی نقصان نہیں پہنچے گا۔

پولیٹیکل انتظامیہ اور امن کمیٹی یہ بتانے گریز کر رہے ہیں کہ اغواء کار کون تھے اور مغویوں کو چھڑانے میں جرگے والے کیسے کامیاب ہوگئے ہیں۔

پولیٹیکل انتظامیہ کے اعلیٰ حکام جرگے کے ممبران کے نام بتانے اور کوئی بات کرنے کو تیار نہیں ہیں۔

حکام کا یہ بھی کہنا ہے کہ اغواء کیے جانے والے اہلکاروں کو کسی ذاتی معاملے میں اغواء کیا گیا تھا اور جرگے کا اس میں کوئی کردار نہیں ہے۔ ان کو ایف آر بنوں کے علاقہ آزاد منڈی میں چھوڑ دیا گیا جہاں سے وہ خود بنوں سرکٹ ہاؤس پہنچ گئے ہیں۔

واضح رہے کہ انیس مئی کو نامعلوم افراد نے محکمہ بہبود آبادی کے آٹھ اہلکاروں پر مشتمل ایک ٹیم کو اغواء کر لیا تھا۔اغواء ہونے والوں میں تین خواتین بھی شامل تھیں۔

حکام نے بتایا تھا کہ محکمہ بہبود آبادی کے یہ اہلکار بنوں سے میرانشاہ سے جا رہے تھے کہ نامعلوم نقاب پوشوں نے تحصیل میر علی کے گاؤں ناوراک کے قریب انہیں اسلحہ کے زور پر اغواء کر لیا تھا۔ اغواء کے موقع پر اہلکاروں کے ساتھ خاصہ دار فورس اور پولیٹیکل انتظامیہ کے اہلکار بھی موجود تھے۔

عینی شاہدین کے مطابق اغواء کاروں کی تعداد ایک سو سے زائد تھی۔ بعد میں خاصہ دار فورس سےاسلحہ چھین لیا گیا تھا۔