عبدالحئی کاکڑ بی بی سی اردو ڈاٹ کام، پشاور

	کافی عرصہ بعد ایک بار پھر کسی سرکاری ملازم کو نشانہ بنایا گیا ہے

ڈرائیور اصل میر پر جمعہ کی صبح سرگردان چوک کے قریب ایک سفید گاڑی میں سوار بعض نامعلوم نقاب پوشوں نے اس وقت فائرنگ کی جب وہ ایک سروس سٹیشن پر سرکاری گاڑی کی دھلائی میں مصروف تھے۔ اصل میر موقع پر ہی ہلاک ہو گئے۔

مقتول کا تعلق شمالی وزیرستان کے گاؤں بیگان سے تھا اور مقامی لوگوں کے مطابق ان کی کسی سے ذاتی دشمنی نہیں تھی۔اصل میر کو اپنے گاؤں میں سپرد خاک کر دیا گیا ہے۔

شمالی وزیرستان میں مقامی لوگوں کا کہنا ہے کہ یہ بظاہر ٹارگٹ کلنگ کا واقعہ معلوم ہو رہا ہے اور ایک طویل عرصے کے بعد کسی بھی سرکاری ملازم کو نشانہ بنائے جانے کا پہلا واقعہ ہے۔

جنوبی اور شمالی وزیرستان میں پاکستانی فوج اور مقامی طالبان کے درمیان لڑائی میں کئی افراد ٹارگٹ کلنگ کا نشانہ بنتے رہے ہیں۔ تاہم حکومت اور طالبان کے درمیان ہونے والے معاہدے میں مقامی طالبان کو پابند کیا گیا تھا کہ لوگوں کو ٹارگٹ کلنگ کا نشانہ نہیں بنایا جائے گا۔