رفاقت علی بی بی سی اردو ڈاٹ کام، اسلام آباد

	’جسٹس افتخار کے دورۂ کراچی کے دوران کچھ ’لاڈلوں‘ نے کسی کے کہنے پر روکاوٹیں کھڑی کیں‘

انہوں نے کہا کہ کراچی کسی ایک جماعت کا شہر نہیں ہے بلکہ سندھی، پنجابی، پٹھان اور اردو بولنے والوں کا شہر ہے۔ انہوں نےکہا کہ کراچی پاکستان کے سب سے زیادہ پڑھے لکھے لوگوں کا شہر ہے لیکن کچھ ’لاڈلے‘ اس کا امن خراب کر رہے ہیں۔

انہوں نے کہا کہ وہ متحدہ قومی موومنٹ کی ’منت‘ کریں گے کہ چیف جسٹس کے دورے کےدوران امن عامہ کی صورتحال خراب نہ کی جائے۔

انہوں نے کہا حکومت جسٹس افتخار کے ساتھ ہونےوالی زیادتی پر عوامی ردعمل پر بوکھلا گئی ہے اور جب وہ بارہ مئی کو جب چیف جسٹس سندھ ہائی کورٹ بار ایسوسی ایشن کی دعوت پر کراچی گئے تو انہیں دس گھنٹے تک ائرپورٹ پر محبوس رکھا گیا۔

اعتزاز احسن نے کہا کہ جسٹس افتخار اس سے پہلے راولپنڈی، سکھر، حیدرآباد، پشاور اور لاہور گئے اور وہاں لاکھوں لوگ ان کا استقبال کرنے آئے لیکن ایک بھی ناخوشگوار واقعہ پیش نہیں آیا۔

’کراچی ہلاکتوں کی ذمہ داری‘ جنرل مشرف نے مجھ پر جھوٹا الزام لگایا ہے۔ میں ان کے خلاف دو ارب روپے ہرجانے کا دعویٰ کروں گا۔ ہرجانے کے دعوے میں واضح لکھوں گا کہ رقم کی ادائیگی سرکاری خزانے سے نہیں بلکہ پرویز مشرف کی ذاتی جائیداد بیچ کر کی جائے اعتزاز احسن

انہوں نے کہا کہ انہوں نے کچھ اخبارات میں پڑھا ہے کہ صدر جنرل مشرف نے مسلم لیگ (ق) کے ممبران سے ملاقات کے دوران کہا کہ کراچی میں ہونے والی اموات کی ذمہ داری جسٹس افتخار اور اعتزاز احسن پر عائد ہوتی ہے۔

اعتزاز احسن نےکہا کہ جنرل مشرف نے ان پر جھوٹا الزام لگایا ہے اور وہ فوجی حکمران کے خلاف دو ارب روپے ہرجانے کا دعویٰ کریں گے۔ انہوں نے کہا کہ وہ ہرجانے کے دعوے میں واضح لکھیں گے کہ رقم کی ادائیگی سرکاری خزانے سے نہیں بلکہ پرویز مشرف کی ذاتی جائیداد بیچ کر کی جائے۔

اعتزاز احسن نے کہا کہ اگر وہ کامیاب ہوگئے تو ہرجانے کی رقم کراچی کے عوام کی نظر کردیں گے۔