رفاقت علی بی بی سی اردو ڈاٹ کام، اسلام آباد

	’کسی سیاسی جماعت کو جسٹس افتخار کے والہانہ استقبال سے پریشان نہیں ہونا چاہیے‘

جسٹس افتخار محمد چودھری کے وکیل جسٹس (ریٹائرڈ) طارق محمود نے بی بی سی کو بتایا ہے کہ جسٹس افتخار کے پروگرام میں کوئی تبدیلی نہیں ہو رہی ہے اور وہ اپنے پہلے سے طے شدہ پروگرام کے مطابق کراچی جائیں گے۔

تخریب کاری کا خدشہ ہے: شیر افگن نیازی

سندھ حکومت نے سپریم کورٹ کے رجسٹرار کے ذریعے جسٹس افتخار محمد چودھری سے کہا ہے کہ وہ اپنی حفاطت کے پیش نظر بارہ مئی کو کراچی آنے کا پروگرام منسوخ کر دیں۔

متحدہ قومی موومنٹ نے بھی بارہ مئی کو عدلیہ کی آزادی کے لیے ریلی منعقد کرنے کا اعلان کر رکھا ہے اور انہوں نے چیف جسٹس کے دورے کی مخالفت کی ہے۔ خدشہ ظاہر کیا جا رہا ہے کہ ایم کیو ایم اور جسٹس افتخار محمد چودھری کے حامیوں میں تصادم ہو سکتا ہے۔

جسٹس (ریٹائرڈ) طارق محمود نے کہا ہے جسٹس افتخار کے کوئی سیاسی مقاصد نہیں ہیں اور وہ صرف سندھ ہائی کورٹ بار ایسوی ایشن کی دعوت پر کراچی جا رہے ہیں۔ انہوں نے کہا ’کسی سیاسی جماعت کو جسٹس افتخار محمد چودھری کے والہانہ استقبال سے پریشان نہیں ہونا چاہیے‘۔