ذوالفقار علی بی بی سی اردو ڈاٹ کام، مظفرآباد

	اقوام متحدہ کے چھ ادارے متاثرہ علاقوں میں تعمیر نو اور بحالی کے کاموں میں مدد دے رہے ہیں (فائل فوٹو)

اسلام آباد میں اقوام متحدہ کے ریذیڈنٹ کوآرڈینیڑ کی ترجمان رابعہ امجد نے بدھ کے روز ایک بیان میں کہا ہے کہ موجودہ سکیورٹی کی صورت حال اور کشیدگی کے باعث باغ تحصیل میں اقوام متحدہ نے فوری طور پر دو ہفتے کے لیے اپنی سرگرمیاں معطل کرنے اور دفاتر بند کرنے کا فیصلہ کیاہے، تاہم اس دوران ہنگامی خدمات جاری رہیں گی۔

باغ میں مقامی لوگوں اور امدادی تنظیمیوں کے درمیان مقامی خواتین کو بھرتی کرنے کے معاملے پر کافی عرصے سے ایک تناؤ کی سی کیفیت ہے اور یہاں مختلف مکاتب فکر کے لوگوں پر مشتمل عوامی ایکشن کمیٹی کے نام سے ایک محاز بھی قائم کیا گیا جس کے تحت آئے روز مظاہرے ہوتے ہیں۔

محاز کا الزام ہے کہ امدادی تنظیمیں نہ صرف مقامی مردوں کو نظر انداز کرکے پاکستان کے دوسرے علاقوں سے مردوں کو بھرتی کرتی ہیں بلکہ مقامی طور پر بھرتی کی جانے والی خواتین کو جنسی طور پر ہراساں بھی کیا جاتا ہے اور ان کو اخلاقی بے راہ روری کی ترغیب دی جاتی ہے۔

اقوام متحدہ کی ترجمان رابعہ امجد کا کہنا ہے کہ باغ میں سرگرمیاں عارضی طور پرمعطل کرنے کا فیصلہ اقوام متحدہ کے دو افسروں کی رہائشگاہ میں حال میں آتشزدگی کے بعد کیا گیا ہے ۔ان کا کہنا ہے کہ گھر کو کسی نے جان بوجھ کر آگ لگائی تھی

حال ہی میں باغ شہر میں ایک مشتعل ہجوم نے تعمیر نو سے متعلق اقوام متحدہ کے ادارے کی ایک گاڑی کو نقصان پہنچایا تھا۔ پولیس نے اس سلسلے میں دس مطلوب افراد میں سے چھ کوگرفتار کیا ہے۔

لیکن اقوام متحدہ کی ترجمان رابعہ امجد کا کہنا ہے کہ باغ میں سرگرمیاں عارضی طور پرمعطل کرنے کا فیصلہ اقوام متحدہ کے دو افسروں کی رہائشگاہ میں حال میں آتشزدگی کے بعد کیا گیا ہے ۔ان کا کہنا ہے کہ گھر کو کسی نے جان بوجھ کر آگ لگائی تھی جبکہ پولیس کا کہنا ہے کہ وہ فی الوقت تحقیقات کر رہی ہے۔

اقوام متحدہ کے کم از کم چھ ادارے اس وقت متاثرہ علاقوں میں تعمیر نو اور بحالی کے کاموں میں مدد دے رہے ہیں۔

اقوام متحدہ کی ترجمان نے بیان میں کہا ہے صورت حال بہتر ہونے پر سرگرمیاں بحال کی جائیں گی۔