رفعت اللہ اورکزئی بی بی سی اردو ڈاٹ کام، پشاور

	مسیحی برادری کو ریاستی قوانین سے بھی شکایت رہی ہے کہ ان پر جھوٹے مقدمات بنتے ہیں

چارسدہ میں عیسائی کمیونٹی کے رہنما سلیم چوہدری نے بی بی سی کو بتایا کہ ایک خط منگل کی رات مسلم کالونی میں پھینکا گیا ہے جس میں دھمکی دی گئی ہے کہ ’ چارسدہ کے عیسائی دس دن کے اندر اندر مسلمان ہوجائیں یا یہ ضلع چھوڑدیں ورنہ پھر بم کی کاروائی ہوگی‘۔

مسلم کالونی میں عیسائیوں کے سات خاندان رہائش پذیر ہیں جبکہ چارسدہ شہر میں مجموعی طورپر ساٹھ کے قریب عیسائی خاندان رہ رہے ہیں۔

سلیم چوہدری نے کہا کہ خط ملنے کے بعد انہوں نے چارسدہ کے تمام عیسائیوں کا ایک اجلاس طلب کیا ہے جس میں موجود صورتحال پر بحث کی جائے۔
ان کا کہنا تھا کہ ان دھمکی آمیز خطوط کے بعد چارسدہ میں رہنے والی تمام عیسائی برادری سخت خوف و ہراس اور عدم تحفظ کا شکار ہوگئی ہے۔

سلیم چوہدری کا کہنا ہے کہ اس واقعہ سے پولیس کو بھی مطلع کردیا گیا ہے تاہم تاحال اس سلسلے میں کوئی قابل ذکر اقدام نہیں اٹھایا گیا۔

چارسدہ پولیس نے عیسائیوں کمیونٹی کو ملنے والے خطوط کی تصدیق کی ہے۔ پڑانگ پولیس کے ایک اہلکار نے بی بی سی کو بتایا کہ گزشتہ رات یہ خطوط مسلم کالونی میں پھینکے گئے ہیں جس کی تحقیقات کی جا رہی ہیں۔

واضح رہے کہ گزشتہ جمعہ کو چارسدہ میں سی ڈیز کی دو دکانوں کو بم حملوں کا نشانہ بنایا گیا تھا جبکہ گیارہ دن قبل اسی شہر میں وزیر داخلہ افتاب احمد خان شیرپاؤ کے ایک جلسہ میں خودکش حملہ ہوا تھا جس میں درجنوں افراد ہلاک ہوئے تھے۔