عزیزاللہ خان بی بی سی اردو ڈاٹ کام کوئٹہ

	حملہ آوروں کی شناخت نہیں ہو سکی

کوئٹہ کے ڈپٹی انسپکٹر جنرل پولیس رحمت اللہ نیازی نے بتایا ہے کہ تین اِنچ قطر کی پائپ لائن کو دھماکہ خیز مواد سے اڑایا گیا ہے جس سے کلی مدد کو گیس کی ترسیل معطل ہو گئی ہے۔

حملہ آوروں کی شناخت نہیں ہو سکی تاہم پولیس اس بارے میں تحقیات کر رہی ہے۔

رات گئے کوئٹہ کے سبزل روڈ پر ایک ڈاکٹر کے مکان کی چھت پر نا معلوم افراد نے دستی بم پھینکا تھا جس سے مکان کے شیشے ٹوٹ گئے ہیں لیکن کوئی جانی نقصان نہیں ہوا۔

اس کے علاوہ سریاب روڈ پر ایک ڈاکخانے کے قریب دھماکے کی اطلاعات موصول ہوئی ہیں لیکن پولیس حکام نے اس دھماکے کی تصدیق نہیں کی۔ مکران ڈویژن کے شہرتربت سے بھی دھماکے کی اطلاع ہے۔

کوئٹہ میں کچھ دنوں کے وقفے کے بعد پھر دھماکے ہوئے ہیں۔ تاحال ان دھماکوں کی ذمہ داری کسی تنظیم نے قبول نہیں کی ہے۔

دو روز پہلے پٹ فیڈر کے علاقے میں بارودی سرنگ کے دھماکے سے ایک شخص ہلاک ہو گیا تھا۔