عبدالحئی کاکڑ بی بی سی اردوڈاٹ کام، پشاور

	درجنوں افراد کو امریکہ کے لیے جاسوسی کے الزام میں قتل کیا گیا ہے جس کی ذمہ داری ابھی تک کسی نے قبول نہیں کی ہے۔

ضلع ٹانک کے ضلعی رابطہ آفیسر محسن شاہ نے بی بی سی کو بتایا کہ اتوار کی صبح سات بجے انہیں اطلاع ملی کہ ٹانک سے تقریباً بیس کلومیٹر مغرب کی جانب پلاسٹک کے تھیلے میں دو لاشیں پڑی ہیں۔

ان کا مزید کہنا تھا کہ قتل ہونے والے دونوں افراد مقامی ہیں اور لاشوں کے ساتھ رکھے گئے ایک خط میں ان پر امریکہ کے لیے جاسوسی اور جعلی کرنسی کے کاروبار کرنے کا الزام لگایا گیا ہے۔ ان کا مزید کہنا تھا کہ اردو زبان میں لکھے گئے خط میں خبردار کیا گیا تھا کہ امریکہ کے لیےجاسوسی کرنے کا انجام یہی ہوگا۔

ان کے مطابق لعل فیاض کی لاش ان کے ورثاء کے حوالے کردی گئی جبکہ بختیار کے اہل خانہ نے ان سے رابطہ کر لیا ہے۔

واضح رہے کہ پاکستان کے قبائلی علاقے شمالی اور جنوبی وزیرستان میں درجنوں افراد کو امریکہ کے لیے جاسوسی کرنے کے الزام میں قتل کیا گیا ہے جسکی ذمہ داری ابھی تک کسی نے قبول نہیں کی ہے۔ تاہم علاقے میں مبینہ طور پر سرگرم مقامی عسکریت پسندوں پر ان واقعات میں ملوث ہونے کاالزام لگایا جاتا ہے۔