رفعت اللہ اورکزئی بی بی سی اردو ڈاٹ کام، پشاور

	حکومت اور مقامی طالبان کے درمیان امن معاہدے کے بعد ٹارگٹ کلنگ میں اضافہ ہوا ہے

شمالی وزیرستان کے صدر مقام میران شاہ میں سرکاری ذرائع کا کہنا ہے کہ جمعہ کو پاک افغان سرحد کے نزدیک واقع علاقے ماشر کوٹ میں گندے پانی کے نالے سے ایک افغان مہاجر کی لاش ملی ہے۔

لاش دیکھنے والے ایک شخص نے نام ظاہر نہ کرنے کی شرط پر بی بی سی کو بتایا کہ مقتول کا آدھا گلا کٹا ہوا تھا جبکہ اس کے سر پر گولیاں لگنے (فائر آرم) کے زخم تھے۔

ان کا کہنا تھا کہ لاش کے قریب سے ایک خط بھی ملا ہے جس میں کہا گیا ہے کہ’ غفور تانڑائی (مقتول) افغان مہاجر تھا اور علاقے میں امریکیوں کے لیے جاسوسی کرتا تھا‘۔

شمالی وزیرستان میں گزشتہ سال ستمبر کے مہینے میں مقامی طالبان اور حکومت کے مابین امن معاہدے کے بعد وہاں پر جاری جھڑپوں میں کافی حد تک کمی واقع ہوئی ہے، لیکن ’ ٹارگٹ کلنگ‘ کے واقعات میں اضافہ ہو رہا ہے۔

گزشتہ روز بھی شمالی وزیرستان میں نامعلوم افراد نے فائرنگ کرکے تین سرکاری اہلکاروں کو ہلاک جبکہ تین کو زخمی کردیا تھا۔ ان واقعات کی ذمہ داری تاحال کسی نے قبول نہیں کی ہے۔