عباد الحق بی بی سی اردو ڈاٹ کام، لاہور

	ڈی جی ایف آئی اے نے جاوید آمرے کی گرفتاری کے لیے ایک خصوصی ٹیم تشکیل دی تھی (فائل فوٹو)

جاوید آمرے والا انسانی سمگلنگ کے مقدمات میں ایف آئی کو کافی عرصے سے مطلوب تھا اور اس کی گرفتاری پر لاکھوں روپے کا انعام رکھا گیا تھا۔

ایف آئی اے حکام کے مطابق جاوید آمرے پر لوگوں کو یورپ، امریکا اور دیگر ممالک میں سمگل کرنے کا الزام ہے۔

ایف آئی اے کے سسٹنٹ ڈائریکٹر نصراللہ گوندل نے اسلام آباد میں ہمارے نامہ نگار احمد رضا کو بتایا کہ ملزم ایف آئی اے کی انسانی سمگلنگ کے مقدمات میں سب سے زیادہ مطلوب افراد میں سرفہرست ہے۔

انہوں نے کہا کہ ملزم کی تلاش کافی عرصے سے جاری تھی لیکن سنیچر کو خفیہ اطلاع پر کارروائی کرتے ہوئے اسے دارالحکومت اسلام آباد سے لگ بھگ 50 کلومیٹر دور چکری کے قریب سے موٹروے سے گرفتار کرلیا۔

انہوں نے کہا کہ ملزم لاہور سے اسلام آباد سفر کر رہا تھا۔ وہ گجرات کے قصبے آمرے والا کا رہنے والا ہے۔ ایف آئی اے کے مطابق ملزم کے خلاف 22 سے زائد مقدمات کا پتہ چل سکا ہے لیکن مقدمات کی اصل تعداد اس سے زیادہ ہوسکتی ہے جن کی تفصیلات جمع کی جارہی ہیں۔

انہوں نے کہا کہ زیادہ تر مقدمات ایف آئی اے پاسپورٹ سرکل گوجرانوالہ میں درج ہیں جبکہ لاہور اور کراچی میں بھی اس کے خلاف مقدمات ہیں۔ نصراللہ گوندل کے مطابق ملزم کی گرفتاری پر ایک لاکھ روپے انعام مقرر تھا۔

انہوں نے کہا کہ جو خاندان بھی جاوید کے جرائم سے متاثر ہوئے ہیں وہ ایف آئی اے سے رابطہ کریں انہیں ریلیف دیا جائے گا۔

ڈی جی ایف آئی اے نے جاوید آمرے کی گرفتاری کے لیے ایک خصوصی ٹیم تشکیل دی تھی اور بہت عرصے سے اس کی گرفتاری کے لیے کوششیں کی جا رہی تھیں۔ جاوید آمرے والا کو اتوار کو خصوصی عدالت میں پیش کیا جائے گا اور چھان بین کے لیے اس کا ریمانڈ لیا جائے گا۔