عبدالحئی کاکڑ بی بی سی اردوڈاٹ کام، پشاور

	علاقے کے لوگوں کا کہنا ہے کہ کوہی شیر حیدر میں تباہ کیگئی عمارت ایک کاروباری مرکز تھا

پولیٹکل انتظامیہ کے ایک اہلکار نے بی بی سی کو بتایا کہ باڑہ سے آٹھ کلومیٹر دور کوہی شیر حیدر میں مبینہ طور پر قائم لشکر اسلامی کے مرکز پر بدھ کی رات نیم فوجی ملیشیاء نے قبضہ کر لیا تھا اور جمعرات کی دوپہر مرکز کو تین دھماکے کر کے تباہ کر دیا گیا۔

قبضہ کے وقت لشکر اسلامی کے مسلح افرادنے کوئی مزاحمت نہیں کی ۔

حکام کا کہنا ہے کہ یہاں سے لشکر اسلامی کے مسلح افراد غیر قانونی کارروائیوں میں ملوث تھے اور اپنے مخالفین کو گاڑیوں سے اتار کر اپنے ساتھ لے جاتے تھے۔

تاہم علاقے کے لوگوں کا کہنا ہے کہ کوہی شیر حیدر میں تباہ کی گئی عمارت ایک کاروباری مرکز تھا جہاں 43 دکانیں تھیں اور لشکر اسلامی کا وہاں کوئی دفتر قائم نہیں تھا۔

اس علاقے کی ایجنسی کونسل کے ممبر اور تباہ ہونے والی مارکیٹ میں تین دوکانوں کے مالک صحبت خان کا کہنا ہے کہ مارکیٹ کی تباہی سے انہیں کروڑوں روپے کا نقصان پہنچا ہے ۔

ان کے مطابق ’ یہ ایک کاروباری مرکز تھا جو ہماری قوم نے انیس سوچورانوے میں مشترکہ طور پر بنایا تھا جبکہ مذہبی شدت پسند تنظیمیں لشکر اسلامی اور انصارالسلام کا نام تو ہم محض ایک سال سے سن رہے ہیں۔مارکیٹ کے تباہ ہونے سے ہمیں پانچ سے چھ کروڑ روپے تک کا نقصان پہنچا ہے‘۔

تاہم اس سلسلے میں حکام سے رابطے کی کوشش کامیاب نہیں ہوسکیں۔

واضح رہے باڑہ میں گزشتہ ایک سال سے دو مبینہ مقامی شدت پسند تنظیموں لشکر اسلامی اور انصارالسلام کے مسلح قبائلیوں کے درمیان روزانہ جھڑپیں ہوتی ہیں اور دونوں اپنے اپنے مخالفین کے گھروں کو نذر آتش کرتے ہیں۔

	لڑائی میں ایک اندازے کے مطابق 120 سے زیادہ افراد ہلاک ہوچکے ہیں

لشکراسلامی نے علاقے سے اغواء ، چوری ، بے حیائی اور غیر شرعی حرکات کے خاتمے کے لیے چودہ نکاتی پروگرام کا اعلان کیا تھا جس میں خواتین کے بازار میں اکیلے گھومنے پھرنے اور موسیقی سننے پر پاپندی بھی شامل تھی۔

لشکر اسلامی کا اثر ونفوذ تحصیل باڑہ کےآس پاس علاقوں میں زیادہ ہے جبکہ انصارالسلام کو جس پر حکومتی حمایت کا شک بھی ہے تیراہ کے علاقے پر کنٹرول حاصل ہے۔

لشکر اسلامی کے دو مراکز اس وقت حکومتی کنٹرول میں ہیں لیکن گوگرنہ، نرئی بنگ اور سیدک کے علاقوں میں قائم تنظیم کے دیگر تین مراکز اب بھی فعال ہیں۔

حکام نے کہا ہے کہ لشکر اسلامی کے خلاف اب مزید کاروائی کی جائے گی۔علاقے کے لوگ حکومت پر الزام لگارہے ہیں کہ وہ یہاں امن وامان خراب کرکے مستقل فوجی چھاؤنی کے قیام کا جوازڈھونڈنے کی کوشش کررہی ہے۔