رفعت اللہ اورکزئی بی بی سی اردو ڈاٹ کام، پشاور

	حالیہ دونوں میں بارشوں کے بعد تودے گرنے کے متعدد واقعات پیش آئے ہیں(فائل فوٹو)

پولیس کے مطابق یہ واقعہ بدھ کے روز دیر بالا کے دور افتادہ علاقے سیاسن پاتراک کوہستان میں اس وقت پیش آیا جب ایک ہی گھر کے آٹھ افراد جنگل میں سوختنی لکڑی تلاش کر رہے تھے کہ اچانک قریبی پہاڑ سے برفانی تودہ گرنے سے پانچ افراد اس کے تلے دب کر ہلاک ہوگئے جبکہ تین افراد کو مقامی لوگوں نے زندہ نکال لیا۔

دیر بالا کے ضلعی ناظم صاحبزادہ طارق اللہ نے بی بی سی کو بتایا کہ گزشتہ ایک ہفتہ سے جاری بارشوں کی وجہ سے علاقے میں بڑے پیمانے پر جانی و مالی نقصانات ہوئے ہیں جبکہ سینکڑوں کی تعداد میں مکانات بھی گرے ہیں۔

ان کا کہنا تھا کہ دیر خاص کے علاقے میں بارشوں کی وجہ سے کئی خاندانوں کو سرکاری سکولوں میں منتقل کیا گیا ہے۔ انہوں نے اس بات پر افسوس کا اظہار کیا کہ تاحال صوبائی حکومت نے متاثرین کی امداد کے حوالے سے کوئی توجہ نہیں دی ہے جس کی وجہ سے مقامی لوگوں کے مسائل میں اضافہ ہورہا ہے۔

ادھر ضلع چترال سے ملنے والی اطلاعات کے مطابق دو دن سے جاری برف باری کی وجہ سے علاقے میں مواصلات کا نظام درہم برہم ہوگیا ہے جبکہ دیگر معمولاتِ زندگی بھی بری طرح متاثر ہوئے ہیں۔