رفعت اللہ اورکزئی بی بی سی اردو ڈاٹ کام پشاور

	صدر مشرف اور حکومت کے خلاف نعرے بازی بھی کی گئی

اس بات کا فیصلہ بدھ کے روز متحدہ مجلس عمل کے زیر اہتمام المرکز اسلامی پشاور میں منعقدہ صوبائی آل پارٹیز کانفرنس میں کیا گیا جس کی صدارت ایم ایم اے کے صوبائی صدر سنیٹر مولانا گل نصیب خان نے کی۔

کانفرنس میں عوامی نیشنل پارٹی، مسلم لیگ (ن)، تحریک انصاف، وکلاء ، تاجروں اور ٹرانپسورٹر تنظیموں کے نمائندوں نے شرکت کی جبکہ پیپلز پارٹی پارلمینٹرینز کے نمائندوں نے کانفنرس میں شرکت نہیں کی۔

ایم ایم اے کے صوبائی صدر نے کہا کہ وردی میں ملبوس آرمی چیف اور صدر کی طرف سے سپریم کورٹ کے چیف جسٹس کو آرمی ہاؤس میں طلب کرنا اور اسے کئی گھنٹوں تک محبوس رکھ کر استعفی کےلئے مجبور کرنا غیر قانونی اقدامات ہیں۔

انہوں نے کہا کہ جمعہ کے روز نمک منڈی پشاور سے ایک ریلی نکالی جائے گی جس کی قیادت تمام سیاسی جماعتوں کے نمائندے کرینگے جبکہ بعد میں کابلی چوک میں جلسہ عام بھی منعقد کیا جائے گا۔

اس موقع پر بی بی سی سے بات کرتے ہوئے ایم ایم اے کے مرکزی صدر قاضی حسین احمد نے کہا کہ اگر سپریم جوڈیشل کونسل نے چیف جسٹس کےخلاف کارروائی کی تو یہ غیر آئینی اقدام ہوگا۔

ادھر دوسری طرف پشاور میں آج تیسرے روز بھی وکلاء کی جانب سے تمام عدالتوں کا بائیکاٹ کیا گیا اور پشاور ہائی کورٹ کے عمارت کے سامنے احتجاجی دھرنا دیا گیا۔

اس موقع پر وکلاء نے اعلان کیا کہ کل یعنی جمعرات کو دو گھنٹوں تک عدالتوں کا علامتی بائیکاٹ جاری رکھاجائے گا جبکہ ہائی کورٹ کے احاطے میں بھوک ہڑتال کیمپ بھی لگایا جائے گا۔