ریاض سہیل اور عزیز اللہ خان بی بی سی اردو ڈاٹ کام، کراچی / کوئٹہ

	وکلاء وزیراعلیٰ سندھ کی جانب سے چیف جسٹس کے بارے میں بیان بازی پر سخت ناراض تھے

کراچی میں وکلاء برادری نے سندھ اسمبلی کے اندر زبردستی داخل ہوکر وزیراعلیٰ ڈاکٹر ارباب غلام رحیم کے خلاف احتجاج کیا اور انہیں متنبہ کیا ہے کہ وہ چیف جسٹس افتخار محمد چودھری کے خلاف بیانات دینے سے گریز کریں۔

سندھ ہائی کورٹ کے احاطے میں وکلاء نے ہاتھوں میں ہاتھ ڈال کر انسانی زنجیر بنائی اور’ پرویز مشرف مردہ باد‘ اور ’عدلیہ کو آزاد کرو‘ کے نعرے لگائے۔

سپریم کورٹ، باہر کیا ہوا

چیف جسٹس کی معطلی: خصوصی ضمیمہ

جسٹسں افتخار کی سپریم کورٹ آمد

’جسٹس افتخار کا استعفیٰ دینے سے انکار‘

’عدليہ کی يرغمالی مہنگی پڑ سکتی ہے‘،رائے دیں

وکلاء سندھ کے وزیراعلیٰ ڈاکٹر ارباب غلام رحیم کی جانب سے چیف جسٹس افتخار محمد چودھری کے بارے میں بیان بازی پر سخت ناراض تھے اور وزیراعلیٰ کے خلاف نعرے لگا رہے تھے۔

ایوان کے داخلی راستے پر وکلاء سے ہائی کورٹ کے سابق جسٹس رشید اے رضوی نے خطاب کرتے ہوئے کہا: ’ ہم یہ احتجاج ریکارڈ کروانا چاہتے ہیں کہ ڈاکٹر ارباب غلام رحیم گزشتہ ایک ہفتے سے الٹے سیدھے اور ہتک آمیز بیانات دے رہے ہیں۔ وکلاء کا موقف ہے کہ جو ہاتھ بھی عدلیہ کی جانب طرف اٹھے گا، اسے کاٹ دیا جائے گا‘۔

	سندھ ہائی کورٹ کے احاطے میں وکلاء نے ہاتھوں کی انسانی زنجیر بنائی

ایک سوال کے جواب میں انہوں نے کہا: ’ارباب غلام رحیم کے بیانات توہینِ عدالت کے زمرے میں آتے ہیں لیکن ہم اپنی لڑائی سڑکوں پر لڑیں گے اور عدالتوں میں نہیں جائیں گے‘۔

ان کا کہنا تھا: ’چیف جسٹس افتخار محمد چودھری سے جو سلوک روا رکھا گیا ہے اور جس طریقے سے ان کی توہین کی گئی ہے، ایسا سلوک تو چوری کے کیس میں ملوث ایک عام ملزم سے بھی نہیں کیا جاتا ہے۔ اس کو بھی دفاع کا موقع دیا جاتا ہے وہ تو پھر چیف جسٹس ہیں‘۔

کراچی میں بدھ کو ہائی کورٹ اور سٹی کورٹ سمیت تمام عدالتی کارروائی کا بھی بائیکاٹ کیا گیا۔کراچی بار کونسل کی جنرل باڈی میں فیصلہ کیا گیا ہے کہ جمعرات سے روزانہ ایک گھنٹہ عدالتی کارروائی کا بائیکاٹ کیا جائے گا اور علامتی بھوک ہڑتال کی جائے گی۔

دریں اثناء سندھ ہائی کورٹ اور کراچی بار نے مسلم لیگ لائرز فورم سے تعلق رکھنے والے دو وکلاء محفوظ یار اور شفقت ایڈووکیٹ کی رکنیت معطل کردی ہے۔ یہ کارروائی کراچی میں حکمراں مسلم لیگ لائرز فورم کی جانب سے صدارتی حکم کے حق میں مظاہرہ کرنے کے بعد کی گئی ہے۔

ادھر سٹی کورٹ میں بدھ کو ایک وکیل نے حاضر ہونے کی کوشش کی تو وکلاء کی تلخ کلامی ہوئی جس کے بعد اس وکیل کو تشدد کا نشانہ بھی بنایا گیا۔

بلوچستان میں عدالتوں کا بائیکاٹ
بلوچستان میں بدھ کو بھی وکلاء نے عدالتوں کا بائیکاٹ کیا اور کوئٹہ میں گورنر ہاؤس کے سامنے مظاہرے کی کوشش کی لیکن اجازت نہ ملنے پر وکلاء پریس کلب پہنچ گئے۔

صدارتی ریفرنس سے عدالتوں پر حملہ کیا گیا ہے۔ وکلاء برادری اس وقت متحد ہیں اور حکومت کے خلاف بھر پور تحریک جاری رہے گی نائب چیئرمین علی احمد کرد پاکستان بار کونسل

پاکستان بار کونسل کے نائب چیئرمین علی احمد کرد نے اخباری کانفرنس میں کہا ہے کہ صوبے بھر میں بدھ کو بھی عدالتوں کا بائیکاٹ کیا گیا ہے اور بعض مقامات پر احتجاج کیا گیا ہے۔ انہوں نے کہا کہ کل یعنی جمعرات سے ایک گھنٹے کا بائیکاٹ اور جزوی ہڑتالی کیمپ لگائے جائیں گے۔

علی احمد کرد نے کہا کہ صدارتی ریفرنس سے عدالتوں پر حملہ کیا گیا ہے۔ وکلاء برادری اس وقت متحد ہیں اور حکومت کے خلاف بھر پور تحریک جاری رہے گی۔صوبے کے دیگر اضلاع جیسے ڈیرہ مراد جمالی، تربت، خضدار، لورالائی اور دیگر علاقوں میں وکلاء عدالتوں میں پیش نہیں ہوئے اور احتجاج کیا ہے۔