اعجاز مہر بی بی سی اردو ڈاٹ کام، اسلام آباد

	حکومتی اہلکار کے مطابق نئی چھاؤنیوں میں بھی چوریاں ہوتی رہیں گی

جمعرات کو پارلیمان ہاؤس میں کمیٹی کے چیئرمین ملک اللہ یار کی صدارت میں اجلاس شروع ہوا تو وزارت دفاع کے مالی سال سن دو ہزار اور دو ہزار ایک کے لیے منظور کردہ بجٹ پر لگائے گئے آڈٹ اعتراضات کا جواب دینے کے لیے ایڈیشنل سیکریٹری مقبول علی شاہ پیش ہوئے۔

جب ان سے کمیٹی کے اراکین نے پنو عاقل چھاؤنی کے سٹور سے تین لاکھ کے قریب مالیت کا سامان چوری ہونے کے متعلق وضاحت پوچھی تو ایڈیشنل سیکریٹری نے کہا کہ مقامی لوگ چھاؤنی کی تعمیر کے مخالف تھے اور وہاں مزدور وغیرہ سامان بھی چوری کرلیتے تھے۔

انہوں نے کہا کہ امن و امان سمیت چوریوں جیسے واقعات کا بلوچستان کے شہروں سبی اور کوہلو میں چھاؤنیوں کی تعمیر کے وقت بھی پیش آرہے ہیں اور اس طرح کے اعتراضات آئندہ بھی سامنے آئیں گے۔

واضح رہے کہ ضلع ڈیرہ بگٹی کے شہر سبی اور کوہلو ضلع کے شہر کوہلو میں فوجی چھاؤنیوں کی تعمیر جاری ہے اور بعض مقامی قبائل اس کی مخالفت کرتے ہیں۔ مخالفت کرنے والوں کا کہنا ہے وفاقی حکومت صوبے کے قدرتی وسائل استعمال کرنا چاہتی ہے جبکہ صوبے کو اس کا کم حصہ دیتی ہے۔

دونوں اضلاع میں بگٹی اور مری قبائل کے سرداروں کے حامی سیکورٹی فورسز سے گزشتہ ڈیڑھ برس سے برسر پیکار ہیں۔ مزاحمت کار قبائلی ریاستی مفادات کو نشانہ بناتے ہیں۔

کمیٹی کے بعض اراکین نے سٹور سے سامان چوری کے واقعات میں ذمہ دار فوجی افسران کے بارے میں تحقیقاتی رپورٹس کے متعلق وضاحت پوچھی لیکن ایڈیشنل سیکریٹری انہیں مطمئن نہیں کر پائے۔

اجلاس میں آڈٹ رپورٹ کے دس اعتراضات کو نمٹا دیا گیا اور پورے دن کے ایجنڈے کو ایک گھنٹے میں مکمل کرلیا۔