اعجاز مہر بی بی سی اردو ڈاٹ کام، اسلام آباد

	ڈاکٹر عذرا فضل آصف علی زرداری کی بہن ہیں

پیپلز پارٹی کے سرکردہ رہنما راجہ پرویز اشرف نے قومی اسمبلی اور میاں رضا ربانی نے سینیٹ میں بدھ کو احتجاج کیا اور کہا کہ دس فروری کو صوبہ سندھ کے شہر کوٹڑی میں صوبائی اسمبلی کے ایک حلقے کے ضمنی انتخابات کے موقع پر صوبائی وزیر الطاف انڑ اور ان کے محافظوں نے ان پر گولیاں چلائیں تھیں۔

ڈاکٹر عذرا فضل آصف علی زرداری کی بہن ہیں۔

پیپلز پارٹی کے مطابق جس گاڑی میں عذرا فضل سوار تھیں اس پر چار گولیاں لگی تھیں لیکن وہ گاڑی ’بلٹ پروف‘ تھی اس لیے ان کی جان کو کوئی نقصان نہیں پہنچا۔

وزیر مملکت برائے داخلہ ظفر اقبال وڑائچ نے قومی اسمبلی میں کہا کہ پیپلز پارٹی والوں نے مقدمہ درج کرنے کی تاحال درخواست ہی نہیں دی۔ ان کے مطابق مقدمہ پیپلز پارٹی کی درخواست پر درج ہوسکتا ہے یا عدالتی حکم پر۔

پیپلز پارٹی کے رہنما وزیر کے اس موقف کو رد کرتے ہیں اور ان کا دعویٰ ہے کہ جب انہوں نے متعقلہ وزیر اور ان کے محافظوں کے خلاف مقدمہ درج کرنے کی درخواست دی تو ضلع کوٹڑی کے پولیس سربراہ نے کہا کہ وزیر کا نام خارج کریں تو وہ مقدمہ درج کرنے کو تیار ہیں۔

موجودہ قومی اسمبلی کی مدت کے آخری یعنی پانچویں برس کا پہلا اجلاس شروع ہوتے ہی پیپلز پارٹی کے اراکین نے عذرا فضل اور شیری رحمٰن پر حملوں کے خلاف احتجاج کرتے ہوئے مقدمے درج کرنے کا مطالبہ کیا اور احتجاج کیا۔ ان کے بقول حکومتی یقین دہانیوں کے باوجود جب مقدمات درج نہیں ہوئے تو انہوں نے بدھ کو پارلیمان کے دونوں ایوانوں کی کارروائی کا بائیکاٹ کیا۔

اتحاد برائے بحالی جمہوریت میں پیپلز پارٹی کی اتحادی جماعت مسلم لیگ نواز کے اراکین نے بھی ابتدا میں پیپلز پارٹی کا ساتھ دیا لیکن کچھ دیر بعد وہ ایوان میں واپس آگئے۔

یاد رہے کہ پیپلز پارٹی کی مرکزی سیکریٹری اطلاعات شیری رحمٰن پر کراچی میں کچھ روز قبل جلوس میں شریک ایک خاتون نے حملہ کیا تھا۔