 | | | موجودہ قانون کے تحت بینظیر تیسری بار وزیراعظم نہیں بن سکتیں |
بینظیر بھٹو نے کہا ہے کہ آئندہ انتخابات میں وزیراعظم کے عہدے کے لیے وہ پی پی پی کی امیدوار ہیں۔ انہوں نے ٹائمز آف انڈیا کو دیے گئے ایک انٹرویو میں ان خیالات کا اظہار کیا۔ ’میں وزیراعظم کے لیے پی پی پی کی امیدوار ہوں۔ میں اور پی پی پی عوام سے اپیل کرتے ہیں کہ وہ ہمیں آئینی اکثریت فراہم کریں۔‘ سابق وزیراعظم کا کہنا تھا کہ صرف دو ہی گروپ ایسے ہیں جو پاکستان میں حکومت بنانے کی اہلیت رکھتے ہیں۔ ’یہ یا تو آئی ایس آئی اور اس کے اتحادی ہیں یا پی پی پی اور اس کے اتحادی۔‘ پاکستان میں جنرل مشرف کے متعارف کردہ قانون کے تحت کوئی شخص زیادہ سے زیادہ دو بار وزیراعظم کا عہدہ سنبھال سکتا ہے۔ اس بارے میں ایک سوال کے جواب میں بینظیر نے کہا کہ یہ قانون انہیں ’تیسری بار وزیراعظم بننے سے روکنے‘ کے لیے بنایا گیا ہے۔ ’یہ پابندی صدر اور آرمی چیف پر (کیوں) نہیں لاگو ہوتی۔ لیکن پارلیمنٹ قانون بدل سکتی ہے۔ ترکی میں بھی اسی طرح کی پابندی تھی لیکن وہاں کے رہنما پھر سے منتخب ہوئے۔‘ بینظیر بھٹو اور نواز شریف دونوں ہی دو دو بار پاکستان کے وزیراعظم رہ چکے ہیں۔ پی پی پی کی رہنما نے فوجی حکومت پر سیاست میں مقابلے کے عمل کو ختم کرنے کی کوشش کا الزام لگایا تاکہ پالیسی معاملات پر فوج کا کنٹرول باقی رہے۔ انہوں نے کہا: ’میں فوجیوں اور افسروں کی عزت کرتی ہوں لیکن پالیسی سازی کا کام پارلیمنٹ کا ہے۔‘ | 
باجوڑ: قبائل اور حکومت میں معاہدہ
