عامر احمد خان بی بی سی اردو ڈاٹ کام کراچی

	بینظیر بھٹو اور نواز شریف بحیثیت حلیف ابھی اجنبی ہیں

ملاقات کے دوران اور اس کے فوراً بعد ہونے والے تجزیات و تبصرات نے اس ذریں قول کو ذرا گھاس نہ ڈالی۔

ٹکراؤ  اپنے پورے خاندان کی سیاسی تاریخ کے پیش نظر بینظیر کبھی بھی پاکستان کی عسکری قیادت سے کوئی فیصلہ کن ٹکراؤ نہیں چاہیں گی۔ جبکہ نواز شریف 1993 میں پہلی بار اقتدار سے برطرفی سے لے کر اب تک فوجی قیادت سے مسلسل متصادم ہیں

اس دوران دونوں رہنماؤں نے کئی بار ایک دوسرے کو دیکھا۔ مسکرائے بھی۔ ایک آدھ بار تو نواز شریف صاحب کی آنکھوں میں شفقت تک کا گمان ہوا۔ پاکستان کے نجی ٹیلیویژن چینلوں پر لندن ملاقات کی فوری جھلکیاں نا کافی تھیں سو یہ تاثر بالکل غلط بھی ہو سکتا ہے۔

لیکن اگر یہ صحیح ہے تو یہ ملاقات اتنی بے معنی بھی نہیں جتنی صدر صاحب کے حمایتی سمجھ اور سمجھا رہے ہیں۔ ضرورت صرف اہم باتوں سے ہٹ کر غیر اہم باتوں پر توجہ دینے کی ہے۔

بینظیر بھٹو اور نواز شریف بطور سیاسی حریف کے تو ایک دوسرے کو بخوبی جانتے ہیں مگر بطور حلیف تقریباً اجنبی ہیں۔ دونوں نے اپنے اپنے دور میں ایک دوسرے پر مفاد پرستی اور ملک دشمنی کے الزام لگائے۔ بات خاندانوں تک پہنچی۔ ایک کا باپ رسوا ہوا تو ایک کا شوہر۔

دور حکومت میں پالی گئی اس دشمنی کو ذائل ہوتے ہوتے سات سال کا ایک لمبا عرصہ لگا۔ لیکن کون کہہ سکتا ہے کہ اس کی پیدا کردہ بداعتمادی بھی اس عرصہ میں گھل چکی ہے۔ خاص طور پر جب دونوں نے اپنے اپنے دور میں ’ڈیل‘ بھی کی ہے اور آج تک اس کا خمیازہ بھی بھگت رہے ہیں۔

کچھ بھی ہو سکتا ہے  گرینڈ الائنس اگر آج بن سکتا ہے تو اپنے منطقی انجام کو پہنچے بغیر ٹوٹ بھی سکتا ہے اور آج اگر بی بی- نواز اتحاد ہو سکتا ہے تو کل بی بی_مشرف یا نواز- مشرف اتحاد بھی ہو سکتا ہے۔ یہی تو ممکنات کا فن ہے

ایسے ہزاروں وسوسے دل میں لیے بینظیر بھٹو اور شریف مل تو رہے ہیں لیکن کیا وہ اپنے خدشات کا حل نکال سکیں گے؟

نواز شریف صاحب کی مسکراہٹ میں شفقت اور پیار کا عنصر بھی ایک طرح سے انہیں اندیشوں کی عکاسی کر رہا تھا۔

ان کی مسکراہٹ بی بی کے چہرے کے تاثرات سے ذرا ذیادہ بے لاگ شاید اس لیے بھی تھی کہ ان کے ہاتھ میں اپنی حریف کی نسبت بہت کم پتے ہیں۔ آخری انتخابی نتائج کے مطابق قریبا ً چالیس لاکھ کم۔ پھر ان کا جیل سے نکلنے کا طریقہ بھی اب تک ان کے حمایتیوں کے ذہنوں میں کھٹک رہا ہے۔ انہیں ایک قابلِ اعتماد اور طاقتور سیاسی دوست کی اشد ضرورت ہے جو ماضی کے داغ دھونے میں ان کا ساتھ دے۔

بینظیر محلاتی سازشوں میں منجھی ہوئی ایک ماہر سیاستدان ہیں اور نواز شریف سے روابط بڑھانے کے تمام خدوخال سے اچھی طرح واقف ہیں۔ وہ یہ بھی جانتی ہیں کہ وہ چاہیں تو نواز شریف کو ایک سیاسی مہرے کے طور پر بھی استعمال کر سکتی ہیں۔

اس لحاظ سے دونوں کی موجودہ سیاسی سوچ میں ایک بہت بڑا فرق ہے۔
اپنے پورے خاندان کی سیاسی تاریخ کے پیش نظر بینظیر کبھی بھی پاکستان کی عسکری قیادت سے کوئی فیصلہ کن ٹکراؤ نہیں چاہیں گی۔ جبکہ نواز شریف 1993 میں پہلی بار اقتدار سے برطرفی سے لے کر اب تک فوجی قیادت سے مسلسل متصادم ہیں۔ اپنی حلیف کے برعکس ان کے خاندان کو ابھی تک کوئی جانی نقصان نہیں اٹھانا پڑا اس لیے ان کی معصومیت بھی کافی حد تک برقرار ہے۔

اس طرح کے کئی اور پیچ و خم ہیں جن سے گزر کر بات گرینڈ الائنس اور مشرف مخالف تحریک تک پہنچے گی اور الیکشن میں ابھی سال سے زیادہ کا عرصہ ہے۔

لہذا بہتر یہی ہے کہ ماضی کے حریف اور مستقبل کے حلیفوں کے بیچ آہستہ آہستہ پروان چڑھنے والی محبت کے لیے فی الحال صرف دعا ہی کی جائے۔ ابھی اسے جمہوری یا اصولی پیمانوں سے ماپنے کا وقت نہیں آیا۔