ریاض سہیل بی بی سی اردو ڈاٹ کام کراچی

	مظاہرے سے قبل ہی پولیس کی بھاری نفری ریگل چوک کے اطراف میں تعینات کی گئی تھی

سندھ کے وزیر اعلیٰ ارباب غلام رحیم نے گزشتہ دنوں ایک بیان میں کہا تھا کہ ’بینظیر کبھی وطن واپس نہیں آئیں گی اور ان کی آخری آرام گاہ بھی باہر ہی بنے گی‘۔

پاکستان پیپلز پارٹی کے شعبہ خواتین نے اس بیان کے خلاف احتجاج کا اعلان کیا تھا۔مظاہرے سے قبل ہی پولیس کی بھاری نفری ریگل چوک کے اطراف میں تعینات کی گئی تھی، جس میں خواتین پولیس بھی شامل تھی۔

	دس سے زائد خواتین کارکنوں کو پولیس نے تشدد کے بعد حراست میں لے لیا ہے

ریگل چوک پر جیسے ہی پاکستان پیپلز پارٹی کی کارکن جمع ہونے لگیں تو پولیس نے انہیں منتشر ہونے کے لیے کہا۔ مظاہرین کے انکار پر پولیس نے انہیں پکڑ کر موبائل گاڑیوں میں ڈال دیا۔

اس دوران ایک گھنٹے تک شہر کے مصروف علاقے ریگل چوک پر پولیس اور مظاہرین کے درمیان آنکھ مچولی جاری رہی۔ پولیس کی اس پکڑ دھکڑ کے دوران علاقے سے گزرنے والی عام خواتین کو بھی دشواری کا سامنا کرنا پڑا جنہیں خواتین پولیس نے گھیر لیا۔

مظاہرہ کرنے والی خواتین اس موقع پر ’ماریں گے مر جائیں گے بینظیر کو لائیں گے‘ ، ’سینٹرل جیل جائیں گے بینظیر کو لائیں گے‘ ’ کالا کوا کائیں کائیں‘ کے نعرے لگائے۔

پاکستان پیپلز پارٹی کی رہنما ایم این اے فوزیہ وہاب نے اس موقع پر صحافیوں سے بات کرتے ہوئے کہا کہ اگر کچھ خواتین اپنی رہنما کی بےعزتی کے خلاف احتجاج کر رہی تھیں تو ایسی کون سی قیامت آرہی تھی جو انہیں گرفتار کیا گیا۔

	پاکستان پیپلز پارٹی کے شعبہ خواتین نے وزیر اعلیٰ سندھ کے بیان کے خلاف احتجاج کا اعلان کیا تھا

انہوں نے کہا ’چند خواتین تھیں ان کے پاس ہتھیار نہیں تھے وہ احتجاج کر رہی تھیں جو ان کا بنیادی حق ہے۔ ارباب رحیم چند نہتی عورتوں سے خوفزدہ ہوگئے ہیں‘۔

صدر ٹاؤن کے پولیس افسر نے بتایا کہ خواتین کو حراست میں نہیں لیا گیا تھا۔ ان کے مطابق وہ ٹریفک میں رخنہ پیدا کر رہی تھیں اس لیے انہیں ریگل چوک سے ہٹا کر دوسری جگہ پر چھوڑ دیا گیا۔ ان کا کہنا تھا کہ کسی کو بھی معمولاتِ زندگی متاثر کرنے کی اجازت نہیں دی جاسکتی ۔