ریاض سہیل بی بی سی اردو ڈاٹ کام کراچی

	گھر سے گیارہ افراد نے اغوا کیا اور ایک گھر کی بیٹھک میں لے گئے

نسیمہ لبانو پولیس پہرے میں اپنی والدہ کے ساتھ عدالت پہنچیں۔ انہوں نے عدالت کو بتایا کہ انہیں گھر سے گیارہ افراد نے اغوا کیا اور ایک گھر کی بیٹھک میں لے گئے جہاں دو افراد عبدالستار اور انور نے ان سے زیادتی کی جبکہ دیگر ملزم اس کے جسم کو ہاتھ لگا لگا کر قہقہے لگاتے رہے۔

نسیمہ نے بتایا کہ ان کی چیخ و پکار پر پڑوس کی خواتین آگئیں جس کے بعد ملزمان نے انہیں برہنہ چھوڑ دیا، عورتوں نے ان پر اپنے دوپٹے ڈالے کر گھر پہنچایا۔

تفتیشی پولیس افسر آفتاب فاروقی نے بی بی سی کو بتایا کہ نسیمہ نے عدالت میں چھ گرفتار ملزماں کی شناخت کی۔

عدالت میں گواہوں سردار علی اور جمال الدین نے بھی نسیمہ کے بیان کی تائید کی۔ پولیس کے مطابق ملزماں کا مزید چھ دن کا ریمانڈ لیا گیا انہیں اب تیرہ فروری کو عدالت میں پیش کیا جائےگا۔

واضح رہے کہ میڈیکل رپورٹ میں بھی سولہ سالہ نسیمہ سے زیادتی کی تصدیق کی گئی ہے اور یہ بھی بتایا گیا ہے کہ نسیمہ دو ماہ کی حاملہ ہے۔

اس بارے مقامی اخبارات سے بات کرتے ہوئے نسیمہ نے کہا ہے کہ اس سے قبل بھی اس سے زیادتی کی گئی تھی مگر وہ خوف میں خاموش رہی، پولیس کا کہنا ہے کہ اس بیان کی روشنی میں بھی تحقیقات کی جاری ہیں۔
نسیمہ کو دس روز قبل میبنہ طور پر اغوا کرکے کے زیادتی کا نشانہ بنایا گیا۔

پولیس ابھی تک چھ ملزماں کو گرفتار کرنے میں کامیاب نہیں ہوسکی ہے، جس کے بارے میں تفتیشی پولیس کا کہنا ہے میڈیا میں یہ اشو آنے کے بعد ملزماں فرار ہیں پولیس ان کے بارے میں حاصل کر رہی ہے۔