اعجاز مہر بی بی سی اردو ڈاٹ کام، اسلام آباد

	احتجاجی مظاہرہ بھارتی سفارت خانے کے سامنے کیا گیا جو کہ اسلام آباد کے ہائی سکیورٹی زون میں واقع ہے

بھارتی سفارت خانہ پاکستان کے دارالحکومت اسلام باد کے ہائی سکیورٹی زون میں واقع ہے، جہاں عام طور پر مظاہرے کرنے کی اجازت نہیں دی جاتی۔

مظاہرین کی قیادت حریت کانفرنس کے مقامی رہنماؤں یوسف نسیم اور اشرف صراف نے کی۔ مظاہرین نے جہاں ہندوستان اور پاکستان کے درمیان جاری مذاکراتی عمل کی حمایت کی، وہاں کشمیر کے لیے حق خود ارادیت کا مطالبہ بھی کیا۔

میر واعظ عمر فاروق اور بھارت کے زیر انتظام کشمیر سے پاکستان کے دورے پر آئے حریت کانفرنس کے دوسرے رہنماء اگرچہ اسلام آباد میں موجود تھے لیکن ان میں سے کوئی بھی مظاہرے میں شریک نہ تھا۔

مشرف سے ملاقات  میر واعظ اور دوسرے رہنماء پاکستانی صدر جنرل پرویز مشرف سے ملاقات کے باعث مظاہرے میں شریک نہیں ہو سکے مقامی قیادت

حریت کانفرنس کی مقامی قیادت کا کہنا تھا کہ میر واعظ اور دوسرے رہنماء پاکستانی صدر جنرل پرویز مشرف سے ملاقات کے باعث مظاہرے میں شریک نہیں ہو سکے۔

یوسف نسیم سے جب پوچھا گیا کہ وہ سفارتی علاقے میں احتجاجی مظاہرہ کرنے میں کیسے کامیاب ہوئے کیونکہ یہاں تو کسی کو بھی ایسا کرنے کی اجازت نہیں ہوتی، تو ان کا کہنا تھا کہ وہ ہر سال ایسا کرتے ہیں اور یہ تاثر غلط ہے کہ اس حوالے سے انہیں حکومتی مدد حاصل ہوتی ہے۔

مظاہرے میں خواتین اور بچے بھی شامل تھے۔ مظاہرین نے اس موقع پر بھارت کے زیرانتظام کشمیر میں انسانی حقوق کی پامالی روکنے کا مطالبہ بھی کیا۔