عزیزاللہ خان بی بی سی اردو ڈاٹ کام کوئٹہ

	ملک بھر میں لاپتہ افراد کے خاندان والوں نے احتجاج کیا ہے

کوئٹہ کے قریب نیو کاہان کی رہائشی ایک خاتون بخت بی بی نے اپنے دو بیٹوں کی گمشدگی یا غیر قانونی حراست کے بارے میں بتایا کہ اب ان کے گھر میں اور کوئی نہیں ہے اور وہ لوگوں سے ادھار مانگ کر گزارہ کر رہی ہیں اور جس دن لوگوں نے ادھار دینا چھوڑ دیا تو وہ مر ہی جائیں گی۔

انہوں نے بتایا کہ ان کا ایک بیٹا میر احمد گردے کا مریض ہے اور اس کے بارے میں کچھ پتہ نہیں ہے کہ وہ کہاں ہے۔ اس طرح کی اور بزرگ خواتین بھی انسانی حقوق کی تنظیم کے دفتر میں موجود تھیں جن کے ہاتھوں میں اپنے گھر کے گمشدہ یا بقول ان کے اغوا کیے گئے مردوں کی تصویریں تھیں اور وہ ان کو منظر عام پر لانے کا مطالبہ کر رہی تھیں۔

مری قبیلے کے ان لوگوں نے گزشتہ روز انسانی حقوق کی تنظیم کو ان حراستوں یا گمشدگیوں کے حوالے سے یادداشت پیش کی ہے اور کہا ہے کہ کم سے کم ساڑھے تین سو افراد کو گزشتہ کچھ عرصہ میں اٹھایا گیا ہے۔

انہوں نے انسانی حقوق کی تنظیم کے عہدیداروں کے سامنےاحمد خان نامی شخص کا ذکر کیا ہے جو قانون نافذ کرنے والے اہلکاروں کی فائرنگ سے زخمی ہوا ہے لیکن اس سے ملنے کی اجازت نہیں دی جا رہی۔

انسانی حقوق کی تنظیم کے بلوچستان کے صدر ظہور شاہوانی ایڈووکیٹ نے بتایا کہ ان کی تنظیم کو اس بارے میں تشویش لاحق ہے۔ انہوں نے کہا کہ حکومت شہریوں کو بینادی حقوق فراہم کرنے کی ذمہ دار ہےاور حکومت کو آئینی دائرہ کار میں رہ کر کارروائی کرنی چاہیے۔

بلوچستان حکومت کے ترجمان رازق بگٹی سے رابطہ کیا تو انہوں نے کہا کہ سیاسی قائدین اور کارکنوں کی گرفتاریوں کے حوالے سے اعداد و شمار بڑھا چڑھا کر پیش کیے گئے ہیں۔

اس حوالے سے بلوچستان حکومت کے ترجمان رازق بگٹی سے رابطہ کیا تو انہوں نے کہا کہ سیاسی قائدین اور کارکنوں کی گرفتاریوں کے حوالے سے اعداد و شمار بڑھا چڑھا کر پیش کیے گئے ہیں۔انہوں نے کہا کہ بلوچستان نیشنل پارٹی کے کوئی تریپن افراد کو حراست میں لیا گیا ہے اور یہ کوئی سیاسی گرفتاریاں نہیں ہیں بلکہ یہ لوگ کسی نہ کسی مقدمے میں مطلوب تھے یا امن عامہ کے حوالے سے انہیں حراست میں لیا گیا ہے۔

انہوں نے کہا کہ ان لوگوں کو گرفتار کیا گیا ہے جو کسی نہ کسی مقدمے میں مطلوب تھے اوربے گناہ ثابت ہونے پر انھیں رہا کر دیا جائے گا۔