ایوب ترین کوئٹہ

	فوجی ترجمان نے آپریشن کے دوبارہ آغاز کی تصدیق کی ہے

اطلاعات کے مطابق حالیہ آپریشن تیس دسمبر سے شروع ہوا۔

سوئی سے ملنے والی خبروں کے مطابق مزاحمت کاروں کے خلاف کارروائی کے لیے متعدد ہیلی کاپٹروں کو پرواز کرتے ہوئے دیکھا گیا ہے جبکہ عینی شاہدین کے مطابق انہوں نے اتوار کو دو مسلح افراد کی لاشیں سکیورٹی افواج کی تحویل میں دیکھی ہیں۔

کوئٹہ میں آئی ایس پی آر کے ترجمان کرنل اختر نے ڈیرہ بگٹی میں مزاحمت کاروں کے خلاف آپریشن کی تو تصدیق کی مگر بلوچ مزاحمت کاروں کی ہلاکتوں سے لاعلمی ظاہر کی۔

ڈیرہ مراد جمالی کے ایک مقامی صحافی غنی بحش مگسی کے مطابق حالیہ کارروائی میں چار مزاحمت کاروں کو ہلاک جبکہ سات افراد کو گرفتار کیا گیا ہے۔

مری اتحاد کے ترجمان اللہ بخش مری نے دعوٰی کیا ہے کہ اتوار کو کوہلو اور کاہان میں بھی آپریشن جاری ہے اور فوج نے علاقے کے کئی گھروں کو نذرِ آتش کر دیا اور متعدد افراد کو گرفتار کر کے نامعلوم مقام پر منتقل کر دیا۔ ان کا کہنا ہے کہ گرفتار شدگان میں عورتیں اور بچے بھی شامل ہیں۔

کوئٹہ میں آئی ایس پی آر کے ترجمان کرنل اختر نے ڈیرہ بگٹی میں مزاحمت کاروں کے خلاف آپریشن کی تو تصدیق کی مگر بلوچ مزاحمت کاروں کی ہلاکتوں سے لاعلمی ظاہر کی۔

ادھر نوشکی میں چار جماعتی اتحاد کے رہنماؤں نے ایک احتجاجی ریلی سے خطاب کرتے ہوئے حکومتِ پاکستان سے مطالبہ کیا کہ ڈیرہ بگٹی میں جاری آپریشن فوری طور پر بند کیا جائے۔ مقررین نے بلوچ عوام سے کہا کہ وہ نواب اکبر بگٹی کی قربانی کو یاد رکھیں۔ انہوں نے حراست میں لیےگئے بلوچ رہنماؤں اور کارکنوں کی رہائی کا بھی مطالبہ کیا۔

واضح رہے کہ بلوچستان میں ایک سال سے جاری آپریشن کے دوران مختلف حکومتی اداروں نے سینکڑوں بلوچ باشندوں کو حراست میں لیا ہے اور بہت سے لوگ ایسے بھی ہیں جو ابھی تک لاپتہ ہیں۔

دریں اثناء ڈیرہ مراد جمالی میں رات گئے ریل کی پٹری پر ہونے والے دو دھماکوں کے بعد صوبہ پلوچستان کو سندھ اور پنجاب سے ریل رابطہ منقطع ہوگیا ہے۔ ریلوے حکام کے مطابق یہ دھماکے پندرہ منٹ کے فرق سے اس وقت ہوئے جب سٹیشن سے کوئٹہ سے کراچی جانے والی نائٹ کوچ، بولان ایکسپریس اور لاہور جانے والی جعفر ایکسپریس گزرنے والی تھیں۔

حکام کا کہنا ہے کہ پٹڑی کی مرمت کا کام شروع کر دیا گیا ہے اور چار گھنٹے تک ریل رابطہ بحال کر دیا جائے گا۔