اعجاز مہر بی بی سی اردو ڈاٹ کام، اسلام آباد

	مظاہرین نے صدر مشرف اور امریکی صدر بش کے خلاف نعرے بھی لگائے

مظاہرے کے شرکاء جو کہ خواتین اور بچے تھے انہوں نے بینر اور کتبے اٹھا رکھے تھے جن پر نعرے اور مطالبے درج تھے۔ مظاہرین نے صدر مشرف اور امریکی صدر جارج بش کے خلاف نعرے بھی لگائے۔

لاپتہ افراد کے اہل خانہ سراپا احتجاج

جمعہ کو ہونے والے مظاہرے میں جنوبی پنجاب سے لاپتہ ہونے والے علی حسن اور اسامہ نذیر کے اہل خانہ بھی منظر پر آئے۔

اسامہ نذیر کے ضعیف والد نے کہا کہ ان کا بیٹا بچوں کو قرآن پڑھاتا تھا کیا ایسا کرنا اسلامی ملک میں جرم ہے؟ وہ پھوٹ پھوٹ کر روتے رہے ’مجھے میرا بچہ دے دو‘۔

بہاولپور سے لاپتہ ہونے والے علی حسن کی بیگم نے کہا کہ ان کے شوہر کو انٹیلیجنس حکام نے تین برس قبل اٹھایا لیکن آج تک ان سے ملاقات تک نہیں کرائی گئی ہے۔

ان کے مطابق وہ کینسر کی مریضہ ہیں اور ہر ہفتے انہیں خون کی بوتل لگتی ہے اور ایسے حالات میں وہ بچے پالیں یا اپنی جان بچائیں؟

لاہور کے فیصل فراز کی بزرگ والدہ نے کہا کہ وہ بیوہ ہیں اور ان کی زندگی کا واحد سہارا ان کا بیٹا ہے۔ وہ چار ماہ سے سڑکوں پر پھر رہی ہیں لیکن انہیں انصاف نہیں ملا۔

	شرکاء نے بینرز اٹھا رکھے تھے جن پر نعرے درج تھے (فائل فوٹو)

اٹامک انرجی کمیشن کے سائنٹیفک افسر عتیق الرحمٰن کی بزرگ والدہ اور بہن بھی مظاہرے میں شریک تھیں۔ ان کی بہن نے کہا کہ وہ چھ بہنوں کے اکلوتے بھائی ہیں اور انہیں شادی کے روز اٹھایا گیا اور ابھی تک کچھ پتا نہیں چل رہا۔

آمنہ مسعود جنجوعہ نے کہا کہ ان کے شوہر اسلام آباد سے پشاور تبلیغ کے لیے روانہ ہوئے لیکن دوبرس ہوچلے ان کے متعلق حکومت کچھ نہیں بتاتی۔ انہوں نے کہا کہ ان کے پیاروں کا جرم یہ ہے کہ وہ اعلیٰ تعلیم یافتہ ہونے کے باوجود پکے مذہبی لوگ ہیں۔

مظاہرے سے خطاب کرتے ہوئے رکن قومی اسمبلی میاں اسلم، مولانا عبدالرشید غازی اور خالد خواجہ نے کہا کہ اگر بیسیوں لاپتہ افراد میں سے کسی کے خلاف بھی حکومت کے پاس ثبوت ہیں تو وہ عدالت میں پیش کریں۔

انہوں نے کہا کہ حکومت نے فی شخص امریکہ کے حوالے کرنے کا پانچ ہزار ڈالر معاوضہ لیا ہے لیکن وہ ’ڈفینس آف ہیومن رائیٹس‘ کی جانب سے حکومت کو چھ ہزار ڈالر دینے کو تیار ہے اگر وہ انہیں رہائی دلوائیں۔