عدنان عادل بی بی سی اردو ڈاٹ کام، لاہور

	ان افراد کی گمشدگی کا معاملہ اب سپریم کورٹ میں ہے

جمعرات کو لاہور میں شیعہ طلبا تنظیم امامیہ اسٹوڈنٹس آرگنائزیشن (آئی ایس او) کے زیر اہتمام ایک پریس کانفرنس سے خطاب کرتے ہوئے وکیل امجد علی کاظمی نے الزام لگایا کہ پاکستان میں بھی لوگوں کو غائب کرنے کا ایسا سلسلہ شروع ہوگیا ہے جیسا صدام حسین کے دور حکمرانی میں عراق میں ہوا کرتا تھا۔

انہوں نے کہا کہ ممتاز حسین رضوی، عمران نقوی اور ڈاکٹر علی رضا کو انٹیلی جنس ایجنسیوں نے چھ ماہ سے اپنی تحویل میں رکھا ہوا ہے۔

شیعہ رہنما نے کہا کہ یہ تینوں افراد دبئی میں ایک ساتھ کارو بار کررہے تھے جہاں سے واپسی پر انہیں پاکستان میں انٹیلی جنس ایجنسیوں نے حراست میں لے لیا تھا۔

انہوں نے کہا کہ ان افراد کے لواحقین کو ان کے بارے میں کسی قسم کی اطلاع نہیں ہے۔

ممتاز رضوی تین جولائی سنہ دو ہزار چھ کو اپنی اہلیہ اور بچوں کے ساتھ دبئی سے کراچی ائیر پورٹ اترے تھے اور امیگریشن کاؤنٹر پر سرکاری اہلکاروں نے ان کی اہلیہ کو اپنے بچوں کے ساتھ گھر جانے دیا اور انہیں بتایا کہ ممتاز رضوی کو پوچھ گچھ کے بعد جانے دیا جائے گا۔ تاہم اس وقت سے ممتاز رضوی کا کوئی اتا پتا نہیں ہے۔ وکیل امجد علی

انہوں نے کہا کہ ممتاز رضوی انجینئیر ہیں اور پاکستان نیوی میں بھی کام کرچکے ہیں۔ وہ گزشتہ تین برسوں سے دبئی میں کمپیوٹر کا کارو بار کررہے تھے۔

ان کا کہنا تھا کہ اچانک دبئی حکومت نے ممتاز رضوی کا اقامہ منسوخ کردیا اور انہیں پاکستان جانے کا حکم دیا تھا۔

انہوں نے کہا کہ ممتاز رضوی تین جولائی سنہ دو ہزار چھ کو اپنی اہلیہ اور بچوں کے ساتھ دبئی سے کراچی ائیر پورٹ اترے تھے اور امیگریشن کاؤنٹر پر سرکاری اہلکاروں نے ان کی اہلیہ کو اپنے بچوں کے ساتھ گھر جانے دیا اور انہیں بتایا کہ ممتاز رضوی کو پوچھ گچھ کے بعد جانے دیا جائے گا۔ تاہم اس وقت سے ممتاز رضوی کا کوئی اتا پتا نہیں ہے۔

	پاکستان میں پر اسرار طریقے سے گمشدگیوں کے خلاف مظاہرے بھی ہوئے ہیں

عمران نقوی لاہور میں ہلاک کردیے جانے والے معروف شیعہ رہنما ڈاکٹر محمد علی نقوی کے بھانجے ہیں۔

وکیل امجد علی نے کہا کہ پانچ ماہ پہلے ان افراد کی بازیابی کے لیے سندھ ہائی کورٹ میں درخواستیں دائر کی گئیں تھیں اور عدالت عالیہ نے پولیس حکام، وفاقی ہوم سیکرٹری اور محتلف انٹیلی جنس ایجنیسوں سے ان افراد کے بارے میں دریافت کیا تھا۔

لیکن انہوں نے عدالت عالیہ میں ان کے بارے میں کسی قسم کی اطلاع نہ ہونے کی رپورٹ دی ہے۔ انکے مطابق یہ درخواستیں اب بھی سندھ ہائی کورٹ میں زیر التوا ہیں۔

انہوں نے کہا کہ سندھ ہائی کورٹ نے ملٹری انٹلی جنس کے ڈائریکٹر جنرل کو عدالت عالیہ میں طلب کیا تھا لیکن عدالت کو جواب دیاگیا کہ ان کی شناخت ظاہر نہیں کی جاسکتی۔

شیعہ رہنما نے کہا کہ سپریم کورٹ نے بھی ان افرا دکی گمشدگی پر حکومت پاکستان اور تینوں بڑی انٹیلی جنس ایجنیسوں، ملٹری انٹیلی جنس، (ایم آئی) انٹر سروس انٹیلی جنس (آئی ایس ائی) اور انٹلی جنس بیورو سے آٹھ جنوری کو جواب طلب کیا ہے۔