اعجاز مہر بی بی سی اردو ڈاٹ کام، اسلام آباد

	حادثہ تیز رفتاری کے باعث پیش آیا (فائل فوٹو)

یہ بات جمعہ کو ضلع کوہستان کے ضلعی رابطہ افسر سعد خان اورکزئی نے بی بی سی کو فون پر بتائی اور کہا کہ یہ مِنی بس راولپنڈی سے شمالی علاقہ جات کے شہر استور جارہی تھی۔

انہوں نے بتایا کہ حادثہ تیز رفتاری کے باعث پیش آیا اور بس ڈرائیور سے بے قابو ہوکر ایک بہت بڑی گہری کھائی میں جاگری۔

ان کے مطابق بس میں ڈرائیور اور کنڈیکٹر سمیت تئیس مسافر سوار تھے جبکہ پولیس حکام کے مطابق کل چوبیس مسافر تھے کیونکہ ایک مسافر مانسہرہ سے بھی بٹھایا گیا تھا۔

ضلع کوہستان کے ضلعی پولیس افسر عالم زیب خان کے دفتر سے جب رابطہ کیا گیا تو ان کے آپریٹر نے بتایا کہ وہ وقوعہ پر گئے ہیں۔ آپریٹر نے بتایا کہ تاحال چودہ مسافروں کی لاشیں نکال لی گئی ہیں۔

ان کے مطابق باقی لاشیں نکالنے کے لیے ہیلی کاپٹر طلب کرلیا گیا ہے۔ انہوں نے بتایا کہ حادثے میں پاکستان فوج کے چار اہلکار ہلاک جبکہ ایک زخمی ہے۔

پولیس ذرائع کے مطابق ایک آرمی میڈیکل کور کے نرسنگ سٹاف کا رکن بھی ہلاک ہونے والوں میں شامل ہے۔