اعجاز مہر بی بی سی اردو ڈاٹ کام، اسلام آباد

	مشرف نے کہا کہ قبائلی علاقوں میں تعینات فوج میں کمی کی گئی ہے

یہ بات انہوں نے منگل کے روز ’جنوبی ایشیا میں سلامتی کے غیر روایتی پہلو‘ کے عنوان سے منعقد کردہ دو روزہ سیمینار کی افتتاحی تقریب سے خطاب کے دوران کہی۔

صدر نے کہا کہ مارے جانے والے عسکریت پسندوں کی کارروائیوں کا جب حکومت کو پتہ چلا تو انہیں ایسا کرنے سے روکا گیا تھا لیکن جب وہ باز نہیں آئے تو سیکورٹی فورسز نےکارروائی کی۔

	مقامی لوگوں کے مطابق ہلاک ہونے والوں میں کچھ بچے بھی شامل ہیں

صدر نے سخت لہجے میں کہا کہ جو لوگ یہ کہہ رہے ہیں کہ باجوڑ میں مارے جانے والے معصوم ہیں تو وہ لوگ جھوٹ بول رہے ہیں۔

انہوں نے زور دے کر کہا کہ پاکستان میں کہیں بھی کسی کو حکومت کی رٹ کو چیلینج کرنے کی اجازت نہیں دی جائے گی کیونکہ ان کے بقول جب ایسے عناصر کی تعداد بڑھ جاتی ہے تو ملکی سلامتی کو خطرات لاحق ہوجاتے ہیں۔

انہوں نے کہا کہ وہ جانتے ہیں کہ صرف طاقت کے استعمال سے حل ممکن نہیں اور اس کے لیے سیاسی عمل اور بات چیت کی بھی ضرورت ہے۔

	باجوڑ میں یہ اس نوعیت کا دوسرا حملہ تھا

صدر نے بتایا کہ پاکستان فوج کے پاس جدید اور تباہ کن اسلحہ کی موجودگی کی وجہ سے فوج کی تعداد میں پچاس ہزار کمی کی گئی ہے۔ تاہم انہوں نے یہ نہیں بتایا کہ اب فوجی کی تعداد کتنی ہے۔

انہوں نے کہا کہ دہشت گردی اور انتہا پسندی پوری دنیا کے لیے ایک بڑا خطرہ ہے۔ ان کے مطابق جب تک مسئلہ کشمیر سمیت دنیا کے تنازعات ختم نہیں ہوتے اس وقت تک روایتی سلامتی کے خطرات موجود رہیں گے۔

یہ سیمینار ’انسٹی ٹیوٹ آف ریجنل سٹڈیز‘ اور ’نیشنل کمیشن فار ہیومن ڈیولپمینٹ‘ نے منعقد کیا ہے جو بدھ کو ختم ہوگا۔

منگل کے روز سیمینار سے بھارت سمیت مختلف ممالک کے ریٹائرڈ فوجی جرنیل، ماہرین اور سابق سفارتکاروں نے بھی محتلف موضاعات پر اپنے مقالے پڑھے۔