ایوب ترین بی بی سی کوئٹہ

	بلوچستان کے سیاسی رہنماء بگٹی کی ہلاکت کو فوجی جارحیت قرار دیتے ہیں۔

عید یوم سیاہ کے طور پر منانے کی اپیل بلوچستان نیشنل پارٹی نے کر رکھی ہے۔ بلوچستان کے بیشتر سیاسی رہنماء اسی سالہ نواب بگٹی کی ہلاکت کو فوجی جارحیت قرار دیتے آرہے ہیں۔

بلوچستان کے سابق گورنر اور وزیر اعلیٰ اکبر خان بگٹی دو ماہ قبل کوہلو کے علاقے بمبور میں فوج کے ساتھ ایک مبینہ جھڑپ کے دوران اپنے کچھ ساتھیوں سمیت ہلاک ہوگئے تھے۔

یوم سیاہ کے سلسلے میں بلوچستان کے شہر نوشکی سمیت کئی بڑے شہروں میں نماز عید کے موقع پر نواب بگٹی کی روح کے ایصال ثواب کے لیۓ خصوصی دعائیں کی گئیں۔ سیاسی کارکنوں نے اس موقع پر احتجاج کے طور پر سیاہ پٹیاں باندھ رکھی تھیں۔

کوئٹہ میں نواب بگٹی کی رہائش گاہ پر لوگ بڑی تعداد میں ان کے اہل خانہ سے اظہار ہمدردی کے لیئے گئے۔ اس موقع پر بات چیت کرتے ہوئے نواب

غلام قوم  غلام قومیں عیدیں اور خوشیاں نہیں منایا کرتیں اور بلوچ بھی ایک محکوم قوم ہے نوابزادہ جمیل بگٹی

ادھر ڈیرہ بگٹی سے آنے والی اطلاعات کے مطابق عید انتہائی سادگی سے منائی جا رہی ہے جبکہ سوئی میں بعض مقامات پر نامعلوم افراد نے احتجاجاً سیاہ جھنڈے بھی لہرائے ہیں۔

عید کی صبح نامعلوم افراد کی طرف سے سوئی میں دو راکٹ بھی فائر کیئے گئے، جن میں سے ایک، اطلاعات کے مطابق، عیدگاہ کے قریب جبکہ دوسرا زیر تعمیر فوجی چھاؤنی کے احاطہ میں گرا۔ تاہم راکٹ گرنے کے ان واقعات میں کوئی جانی نقصان نہیں ھوا۔

خود کو بلوچ مزاحمت کاروں کا ترجمان کہنے والے وڈیرہ عالم خان نے عید کے روز سوئی میں راکٹ باری کے واقعات کی ذمہ داری قبول کرتے ہوئے دعویٰ کیا ہے کہ فوجی چھاؤنی میں گرنے والے راکٹ سے جانی نقصان بھی ہوا۔ تاہم کوئٹہ میں حکومتی ذرائع اس واقعہ کی تصدیق نہیں کر رہے۔