ندیم سعید بی بی سی اردو ڈاٹ کام، ملتان

	دھماکے کے نتیجے میں چالیس افراد ہلاک ہوئے تھے۔

سال دو ہزار چار میں سات اکتوبر کی صبح رشید آباد کالونی میں اس وقت ایک زوردار بم دھماکہ ہوا تھا جب سینکڑوں لوگ کالعدم تنظیم سپاہ صحابہ پاکستان کے رہنما مولانا اعظم طارق کی پہلی برسی کے سلسلے میں ہونے والی ایک تقریب میں شرکت کر کے جلسہ گاہ سے نکل رہے تھے۔

دھماکے کے نتیجے میں چالیس افراد ہلاک اور تہتر زخمی ہو گئے تھے۔
پولیس نے ایک شخص عرفان علی شاہ کو اس واقعہ میں ملوث ہونے کے شبہ میں گرفتار کیا تھا۔ انسداد دہشت گردی کی خصوصی عدالت میں چالان پیش کرتے ہوئے پولیس نے دعویٰ کیا تھا کہ عرفان علی نے اپنے ساتھی امجد عباس کے ساتھ مل کر واقعہ سے دو روز قبل ملتان کی شاہ رکن عالم کالونی سے ایک شخص ذیشان سے گاڑی چھینی اور بعد میں اسی گاڑی میں بارود رکھ کر اسے سپاہ صحابہ کی جسلہ گاہ کے باہر پارک کر دیا۔

	گاڑی کے مالک ذیشان نے ملزم کی پہچان میں مدد دی

پبلک پراسیکیوٹر نجف علی نے بتایا کہ مقدمے کی سماعت کمرہ عدالت کی بجائے ملتان سنٹرل جیل میں ہوئی۔ ان کا کہنا تھا کہ استغاثہ کی طرف سے اٹھاسی جبکہ ملزم کے دفاع میں صرف دو گواہ پیش ہوئے۔ استغاثہ کے گواہوں میں سے پانچ ایسے تھے جنہوں نے شناخت پریڈ میں ملزم کی پہچان کی تھی۔