عزیزاللہ خان
بی بی سی اردو ڈاٹ کام، کوئٹہ |  |
| | نواب اکبر بگٹی کی ہلاکت کی خبر پر کوئٹہ سمیت کئی علاقوں میں ہنگامے ہوئے ہیں |
نواب اکبر بگٹی کی ہلاکت کے بعد کوئٹہ سمیت بلوچستان کے مختلف علاقوں میں توڑ پھوڑ اور ہنگامے جاری ہیں بنکوں اور دیگر سرکاری عمارتوں کو نقصان پہنچایا گیا ہے۔ اس دوران کوئٹہ میں ساڑھے چار سو افراد گرفتار کیئے گئے ہیں۔ کوئٹہ میں ہنگاموں میں ایک انسپکٹر سمیت چھ پولیس اہلکاروں کے زخمی ہونے کی اطلاع ہے اور چار مظاہرین زخمی ہوئے ہیں جبکہ جبکہ پنجگور میں ایک شخص زخمی ہوا ہے۔ کوئٹہ کے جنوب میں قلات میں پولیس نے بتایا کہ ایک سرکاری عمارت پر بم کا حملہ کیا گیا اور ٹیلی فون ایکسچینج کو نذر آتش کر دیا گیا۔وہاں سے کسی جانی نقصان کی اطلاع نہیں ملی۔
کوئٹہ میں کرفیو کے باوجود ہنگامے جاری ہیں۔ شہر میں کہیں کہیں نیم فوجی دستوں کی گاڑیاں نظر آرہی ہیں جبکہ پولیس حکام نے بتایا ہے کہ فوج کسی بھی وقت شہر کا کنٹرول سنبھال لے گی۔ کوئٹہ شہر کے علاقے سریاب روڈ سبزل روڈ، منو جان روڈ، عالمو چوک اور دیگر علاقوں میں توڑ پھوڑ کی جارہی ہے۔ سول ہسپتال میں ڈاکٹر عرض محمد نے بتایا ہے کہ عالمو چوک سے دو زخمیوں کو لایا گیا ہے جن میں سے ایک کی حالت تشویشناک بتائی گئی ہے۔ انہوں نے کہا کہ دونوں کو گولیوں کے زخم آئے ہیں۔ پولیس اہلکاروں نے بتایا ہے کہ مظاہرین اور پولیس کے مابین آنکھ مچولی کا سلسلہ جاری ہے۔ بینکوں اور دکانوں سمیت کئی عمارتوں کو نقصان پہنچایا گیا ہے جبکہ کل رات سے اب تک کئی گاڑیوں کو نذر آتش کیا گیا ہے۔ لوگوں نے سڑکوں پر ٹائر جلا رکھے ہیں اور حکومت کے خلاف نعرہ بازی کی جا رہی ہے۔ ادھر صوبے کے دیگر علاقوں میں مکمل شٹر ڈاؤن ہڑتال ہے اور بہت کم گاڑیاں سڑکوں پر نظر آرہی ہیں۔ خضدار سے آمدہ اطلاعات کے مطابق مظاہرین نے توڑ پھوڑ کی ہے اور آگ لگائی ہے۔ گوادر میں بلوچ قوم پرست جماعتوں نے احتجاجی مظاہرہ کیا ہے جبکہ پسنی، تربت، پنجگور، دابندین، نوشکی، ڈیرہ مراد جمالی، ڈیرہ اللہ یار میں بھی حالات انتہائی کشیدہ ہیں۔ گوادر اور پسنی میں مظاہرین نے مسلم لیگ کے دفاتر اور بینکوں کو نقصان پہنچایا ہے۔ نوشکی سے آمدہ اطلاعات کے مطابق مظاہرین نے کئی سرکاری عمارتوں پر پتھراؤ اور توڑ پھوڑ کی ہے۔مختلف علاقوں سے لوگوں نے بتایا ہے کہ انتظامیہ حالات قابوں کرنے میں ناکام ہو گئی ہے۔ | 
کوئٹہ میں کرفیو کے باوجود ہنگامے، فائرنگ اور گرفتاریاں
