عزیزاللہ خان بی بی سی اردو ڈاٹ کام، کوئٹہ

	پاکستان کے مختلف شہروں میں افغان پناہ گزینوں کی بڑی تعداد آباد ہے

کوئٹہ کے سینئر سپرنٹنڈنٹ پولیس غلام محمد ڈوگر نے بتایا کہ شہر کے مختلف علاقوں سے کوئی ایک سو افغانیوں کو گرفتار کیا گیا ہے جو غیر قانونی طور پر یہاں مقیم ہیں۔

ان سے پوچھا گیا کہ پاکستان اور پھر خصوصًا بلوچستان میں بڑی تعداد میں افغان مقیم ہیں تو اچانک یہ کارروائی کیوں شروع کی گئی ہے تو انہوں نے کہا کہ انہیں اس کا علم نہیں ہے اعلیٰ حکام ہی اس کا جواب دے سکتے ہیں۔

جمعیت علماء اسلام کوئٹہ کے سیکرٹری اطلاعات عبدالستار چشتی نے اس بارے میں کہا ہے کہ ان کی اطلاع کے مطابق دینی مدارس کے اٹھانوے طلباء کو گرفتار کیا گیا ہے۔

انہوں نے کہا کہ اگر لفظ افغانی ہونا جرم ہے تو پاکستان میں لاکھوں افغانی رہ رہے ہیں پھر ان سب کے خلاف کارروائی شروع کی جائے۔

بلوچستان میں متحدہ مجلس عمل اور مسلم لیگ کی مخلوط حکومت قائم ہے۔

ستار چشتی نے کہا ہے کہ انہوں اس سلسلے میں اعلیٰ حکام سے رابطے کیے ہیں اور انہیں یہ یقین دہانی کرائی گئی ہے کہ جو بے گناہ ہوں گے انہیں رہا کر دیا جائےگا اگر ایسا نہ کیا گیا تو وہ آئندہ کا لائحہ عمل بعد میں طے کریں گے۔