اعجاز مہر بی بی سی اردو ڈاٹ کام، اسلام آباد

	صدر مشرف کو شوکت عزیز پر مکمل بھروسہ ہے

وزیراعظم شوکت عزیز نے تیرہ جولائی کو اپنی کابینہ کے اراکین کے اعزاز میں کھانہ دیا اور صدر جنرل پرویز مشرف کو بھی مدعو کیا اور صدر نے تمام وزراء کی آرا سن کر کہا کہ آئندہ انتخابات تک وزیراعظم شوکت عزیز ہی رہیں گے اور کوئی تبدیلی نہیں ہوگی۔

اجلاس میں جب وزیر مملکت برائے ریلوے اسحاق خاکوانی نے وزیراعظم کے خلاف شکایت کی تو صدر نے ان کی بات سننے کے بعد ان کی طرف اشارہ کیا اور کہا کہ ’میں نے جو کہا وہ آپ سمجھ گئے ہوں گے‘۔

بارہ جولائی کو جب وفاقی کابینہ کا اجلاس ہوا تو اس میں وزیراعظم سے ڈاکٹر شیر افگن نیازی نے کہا کہ سٹاک مارکیٹ کے بحران میں آپ کا نام آ رہا ہے اور تمام وزرا پریشان ہیں مہربانی فرما کر وضاحت کریں۔ اس پر وزیراعظم نے عمر ایوب سے کہا اور انہوں نے جو وضاحت پیش کی تو کئی وزراء نے کہا کہ انہیں ان کی بات سمجھ میں ہی نہیں آئی کیونکہ عمر ایوب نے مالیاتی امور کے متعلق فنی زبان استعمال کی۔

کابینہ کے اجلاس میں جب فوکر طیاروں کو مسافروں کے لیئے استعمال نہ کرنے پر بات ہوئی تو ریلوے کے وزیر اسحاق خاکوانی نے پی آئی اے کے چیئرمین پر نااہلی کے الزامات لگائے اور نہیں ہٹانے کا مطالبہ کیا تو وزیراعظم نے خاکوانی سے کہا کہ اس وقت پی آئی اے کی کارکردگی پر بات نہیں ہورہی۔

سٹاک مارکیٹ میں حزب محالف نے چودہ ماہ میں دو مرتبہ پیدا کردہ مبینہ مصنوعی بحرانوں میں چھبیس ارب ڈالر کے ڈوبنے کا ذمہ دار وزیراعظم کو قرار دیتے ہوئے ان سے مستعفی ہونے کا مطالبہ کیا تھا۔ اس معاملے میں پسے پردہ چینی کے بحران کے سلسلے میں بھی ایک وزیر کا نام بھی آتا رہا۔

اُس وزیر کی حامی حکومتی جماعت کی ایک خاتون رکن بھی حزب مخالف کے ’ساتھ‘ ہیں۔ کئی حکومت کے حامی اراکین اسمبلی اور بعض وزراء حکومت میں بڑے پیمانے پر تبدیلی کی افواہیں بھی اڑاتے رہے۔

ایسی صورتحال میں وزیراعظم نے تمام وزراء سے کابینہ کے اجلاس میں کہا کہ |ڈرائنگ رومز، میں بیٹھ کر سازشیں نہ کریں اگر کسی کو ان کے خلاف شکایت ہے تو وہ ان سے براہ راست رابطہ کریں۔ لیکن معاملہ پھر بھی نہیں سنبھلا تو وزیراعظم نے پارٹی سربراہ چودھری شجاعت حسین کو اعتماد میں لے کر صدر سے شکایت کر دی۔

	اے آر ڈی کی تحریک میں شروع ہی سے دراڑ پڑ گئی ہے

یہ خبریں ذرائع کے حوالے سے بیشتر مقامی انگریزی اور اردو اخبارات میں شائع ہوئیں اور تاحال ان کی حکومت نے تردید نہیں کی۔

ادھر حزب مخالف میں بھی اختلافات کا چرچا رہا اور جیسے ہی لندن میں ’اے آر ڈی‘ کے اجلاس میں اکتیس جولائی تک حکومت کے مستعفی نہ ہونے کی صورت میں وزیراعظم کے خلاف تحریک عدم اعتماد کا اعلان ہوا تو اس کی مخالفت میں قومی اسمبلی میں قائد حزب مخالف مولانا فضل الرحمٰن کا بیان آیا کہ تحریک اعتماد ناکام ہوجائے گی اور اس طرح کے فیصلے نہیں ہونے چاہیئے۔

فضل الرحمٰن مدہبی جماعتوں کے اتحاد کے اہم رہنما ہیں لیکن اُس اتحاد کے سربراہ قاضی حسین احمد نے اپنی جماعت کے اراکین سے استعفے حاصل کرلیے اور اے آر ڈی کے ساتھ مل کر حکومت کے خلاف احتجاج کا اعلان کردیا۔

حزب مخالف والے یہ دعویٰ بھی کرتے رہے کہ عدم اعتماد میں انہیں حکومت کے کئی اراکین اسمبلی نے حمایت کا یقین دلایا ہے۔ ان کے دعوے کے ساتھ ہی حکومتی جماعت میں اختلافات کی خبریں بھی تیز ہوگئیں اور وزیراعظم نے اکتیس جولائی سے پہلے ہی اپنی صفوں میں دراڑیں پُر کردی ہیں۔

کچھ سیاسی تجزیہ کاروں کا خیال ہے کہ اب بھی اگر حزب مخالف مل کر عدم اعتماد کی تحریک پیش کرے تو وہ کامیاب تو شاید نہیں ہوسکے لیکن ان کے اپنے اراکین سے انہیں زیادہ ہی ووٹ ملیں گے۔