ریاض سہیل بی بی سی اردو ڈاٹ کام ،کراچی

	پولیس کے مطابق تیرہ سال مہندی بلو کو تشدد کرکے قتل کردیا گیا

یہ واقعہ گزشتہ روز سکھر کے قصبے بگڑو بلو میں پیش آیا، جہاں پولیس کے مطابق تیرہ سال مہندی بلو کو تشدد کرکے قتل کردیا گیا۔

مقامی پولیس نے قتل کا مقدمہ درج کرکے مقتولہ کے شوہر ڈہر بلو کو گرفتار کرلیا ہے۔

مہندی بلو کو پانچ سال قبل اس کے ماموں امید علی کے ہاتھوں غیرت کے نام پر کئے گئے قتل کے بدلے میں ڈھر بلو کے حوالے کر دیا گیا تھا۔

مہندی کے بھائی محمد حسین نے صحافیوں کو بتایا کہ ان کی بہن کو ونی کے طور پر دیا گیا تھا۔ شادی کے بعد وہ مسلسل سسرال کے تشدد کا نشانہ بنتی رہی اور مہندی نے کئی مرتبہ ان سے اس کی شکایت بھی کی تھی۔ محمد حسین کے مطابق انہوں نے اپنی بہن کے سسرال والوں کو مارپیٹ کرنے سے روکا تھا مگر آج انہوں نے ان کی بہن کی لاش انہیں بھیج دی۔

واضح رہے کہ اس واقعے سے تئیس روز قبل جیکب آباد کے علاقے ٹھل میں ہونے والے ایک جرگے میں خون کے بدلے میں پانچ بچیوں کے رشتے دینے کا فیصلہ کیا گیا تھا جس کا سپریم کورٹ کے چیف جسٹس نے از خود نوٹس لیا ہے۔

مویشیوں کے عوض پوتیاں

عدالت نے ستائیس جون کو آئی جی سندھ، پولیس جرگے کے امین پی پی پی کے رکن قومی اسمبلی میر ہزار خان بجارانی، پیر آف بھرچنڈی میاں عبدالباقی اور تحصیل ناظم کو فریقین کے طور پر طلب کرلیا ہے۔

ستائیس مئی کو غیرت کے نام پر ہونے والے قتل کے اس جرگے نے یار علی بنگلانی اور حافظ قمرالدین کو ونی کے طور پر پانچ رشتے دینے اور جرمانہ کی سزا سنائی تھی۔ بعد میں غیر سرکاری تنظیموں کے احتجاج اور سیاسی جماعتوں کے دباؤ پر وزیراعلیٰ سندھ نے فریقین اور پولیس کو وزیر اعلیٰ ہاؤس طلب کرکے فیصلے پر عملدرآمد روکنے اور دوسری صورت میں قانونی کارروائی کرنے کی وارننگ دی تھی۔