مبشر زیدی بی بی سی اردو ڈاٹ کام، اسلام آباد

	مقدمے کی پہلی سماعت دسمبر میں ہوئی تھی

عدالت نے صوبہ پنجاب، صوبہ سرحد اور شمالی علاقہ جات کے پولیس سربراہان کو ہدایات جاری کی ہیں کہ وہ اپنے اپنے علاقوں میں ونی اور اس سے ملتی جلتی رسم سوارہ کے واقعات کی روک تھام کریں اور اپریل تک عدالت کو بتائیں کہ ان علاقوں میں ونی اور سوارہ کی رسموں کے تحت کتنی لڑکیوں کی شادیاں کی گئیں ۔

سپریم کورٹ کے چیف جسٹس افتخار محمد چوہدری کی سربراہی میں تین رکنی بنچ نے دو ماہ قبل دسمبر کے مہینے میں صوبہ سرحد سے تعلق رکھنے والی ایک خاتون سماجی کارکن ثمر مناللہ کی درخواست پر ونی کی روایت جسے پشتون لوگ ’سوارہ‘ کہتے ہیں کے معاملے کا نوٹس لیتے ہوئے اس پر کارروائی کرنے کا اعلان کیا تھا۔

سپریم کورٹ کے چیف جسٹس افتخار محمد چوہدری کی سربراہی میں تین رکنی بنچ نے دو ماہ قبل دسمبر کے مہینے میں صوبہ سرحد سے تعلق رکھنے والی ایک خاتون سماجی کارکن ثمر مناللہ کی درخواست پر ونی کی روایت جسے پشتون لوگ ’سوارہ‘ کہتے ہیں کے معاملے کا نوٹس لیتے ہوئے اس پر کارروائی کرنے کا اعلان کیا تھا۔

وکیل نے عدالت سے استدعا کی کہ اس رسم کو غیر قانونی قرار دیا جائے اور اس میں ملوث افراد کو سخت ترین سزائیں دی جائیں تاکہ اس گھناؤنی رسم کا خاتمہ کیا جا سکے۔

سپریم کورٹ نے گزشتہ برس دسمبر میں اس معاملے کا اس وقت نوٹس لیا تھا جب میانوالی کی تین بہنوں نے ونی ہونے سے انکار کرتے ہوئے عہد کیا تھا کہ وہ اس رسم کی بھینٹ چڑھنے کی بجائے مرنے کو ترجیح دیں گی۔

پنجاب کے ضلع میانوالی سے تعلق رکھنے والی ایم اے انگریزی کی طالبہ آمنہ نیازی، ان کی دو بہنوں اور دو کزنز کو تقریباً دس برس قبل اس وقت ونی قرار دیا گیا تھا جب وہ سب کم سن تھیں۔ آمنہ کے چچا اقبال پر قتل کا الزام تھا۔ قتل کے اس مقدمے میں پنچایت نے دونوں فریقین میں صلح کرائی تھی جس کی رو سے ملزم اقبال کے خاندان کی پانچ لڑکیوں کو مقتول کے خاندان میں بیاہنا طے پایا تھا۔

تاہم بالغ ہونے پر آمنہ سمیت پانچوں لڑکیوں نے پچھلے سال نومبر کے مہینے میں ونی ہونے سے انکار کر دیا تھا۔ میانوالی کے نیم قبائلی معاشرے میں ونی جیسی مضبوط روایت کے خلاف لڑکیوں کی بغاوت کا معاملہ ملکی اور بین الاقوامی سطح پر ذرائع ابلاغ کی توجہ کا موضوع بنا۔

آمنہ نیازی اور ان بہنوں کی بغاوت نے میانوالی میں کئی اور لڑکیوں میں ونی کی رسم کے خلاف انکار کی جرات پیدا کی اور عورتوں کے استحصال پر مبنی اس روایت کی سفاکی منظر عام پر آئی۔ آمنہ اور ان کی بہنوں کو اپنی اس جدوجہد میں اپنے والد جہان خان اور چچا اقبال کی بھی پوری حمایت حاصل تھی۔ دونوں بھائیوں نے فریق مخالف کو ونی کے تحت کیئے گئے رشتے ختم کرنے کے عوض زمین و جائیداد دینے کی پیشکش بھی کی جو نہ صرف ٹھکرا دی گئی بلکہ لڑکیاں ونی نہ کرنے کی صورت میں مبینہ طور پر خون خرابے کی دھمکیاں بھی دی گئیں۔

اسی پس منظر میں پاکستانی حکومت نے بدلہ صلح میں لڑکیوں کے رشتے کرنے کے عمل کو قابل تعزیر جرم قرار دیتے ہوئے پہلے ہی ان علاقوں کی ضلعی انتظامیہ کو ہدایات جاری کی تھیں کہ اس رسم کے تحت لڑکیوں کی شادیاں غیر قانونی قرار دیتے ہوئے کسی بھی صورت ان لڑکیوں کی رخصتی نہ ہونے پائے۔

گو حکومت نے دعوی کیا ہے کہ اس رسم کے تحت شادیاں کروانے والے جرگوں کے افراد کودس سال قید سخت کی سزا بھی ہوسکتی ہے۔تاہم ابھی تک پاکستان کی تاریخ میں کسی بھی ونی یا سوارہ ہونے والی لڑکی کے اہل خانہ یا جرگوں کے خلاف کوئی قانونی کاروائی نہیں کی گئی۔