ندیم سعید بی بی سی اردو ڈاٹ کام، ملتان

	خواتین کی تنظیمیں ونی کی رسم کے خلاف آواز اٹھاتی رہی ہیں

پولیس کو اس واقعہ کا علم اس وقت ہوا جب ایک فریق میاں چنوں صدر پولیس اسٹیشن میں پنچایت کے فیصلے پر عملدرآمد کرانے کے لیئے درخواست لے کر آیا۔

درخواست گذار الطاف حسین کے مطابق کچھ عرصہ قبل اسی کے گاؤں چک ایک سو تریپن/پندرہ ایل کے لیاقت اور عمر نے اس کی بیٹی زینت کو ’اغوا‘ کر لیا جو ایک روز بعد معززین علاقہ کے کہنے پر واپس کی گئی۔ اس نے اسی واقعہ کے خلاف تھانہ صدر ہی میں مقدمہ درج کرایا اور کچھ روز بعد ایک پنچایت بھی بلا لی۔

پنچایت میں دونوں فریقین کے علاوہ علاقے میں اثر و رسوخ رکھنے والے متعدد اشخاص نے بھی شرکت کی اور یہ طے پایا کہ لیاقت کا باپ شاہ نواز اپنی چھ سالہ بیٹی بختاور کا رشتہ الطاف کے سولہ سالہ بیٹے ریاض کے ساتھ کرے گا اور جواب میں الطاف لیاقت اور عمر کے خلاف درج زینت کے اغوا کا مقدمے کی پیروی نہیں کر گا۔

درخواست میں الطاف حسین نے الزام لگایا کہ شاہ نواز اب بختاور کی بجائے کسی اور لڑکی کا رشتہ دینا چاہتے ہیں ’جو کہ پنچایت کے فیصلے کی سراسر خلاف ورزی ہے‘۔ میاں چنوں تھانہ صدر کے انچارج انسپکٹر شمس الدین کا کہنا تھا کہ انہوں نے حکام بالا کی ہدایت پر الطاف اور شاہ نواز سمیت سولہ افراد کے خلاف مقدمہ درج کر کے تفتیش شروع کر دی ہے۔

ان کا کہنا تھا کہ ابھی تک اس سلسلے میں کسی شخص کو گرفتار نہیں گیا گیا۔ انہوں نے بتایا کہ ابتدائی تفتیش میں پنچایت کا ہونا ثابت نہیں ہوا۔ تاہم علاقہ یونین ناظم محمد افضل جام کیفی کا کہنا ہے کہ پنچایت ہوئی تھی اور انہوں نے اس میں بیٹھنے والے افراد کو ایسا اکٹھ کرنے سے منع کیا تھا۔