ندیم سعید بی بی سی اردو ڈاٹ کام، ملتان

	زخمی شہر کے ہسپتال میں زیرِ علاج ہیں

دھماکہ شہر کے مرکزی چوک گولائی کمیٹی کے نزدیک واقع دہی بھلے اور فروٹ چاٹ فروخت کرنے والی ایک دکان میں علی الصبح چھ بجے کے قریب ہوا۔ دھماکے کے وقت دکان اور بازار بند پڑے تھے۔

تاہم جس وقت دھماکہ ہوا اس وقت دو اشخاص، پینسٹھ سالہ شیخ اقبال اور بیس سالہ عامر، مذکورہ دکان کے قریب سے گذر رہے تھے۔ شیخ اقبال کے بارے بتایا گیا ہے کہ وہ ڈیرہ کے جنرل بس سٹینڈ پر چائے کا ایک ہوٹل چلاتے ہیں جبکہ عامر سبزی منڈی میں ریڑھی لگاتے ہیں۔ دونوں زخمی ڈیرہ کے ضلعی ہیڈ کوارٹر ہسپتال میں زیر علاج ہیں۔

	بم دھماکے میں دکانیں بالکل تباہ ہو گئیں

چند روز قبل ڈیرہ کے نواحی علاقے کوٹ چھٹہ کے قریب ریلوے لائن کو اس وقت بم سے اڑا دیا گیا تھا جب کوئٹہ سے لاہور جانے والی چلتن ایکسپریس نے کچھ ہی دیر میں ادھر سے گذرنا تھا۔ پچھلے کچھ عرصہ سے ڈیرہ اور اس کے گردونواح میں ریلوے لائن اور گیس اور تیل کی تنصیبات کو مسلسل نشانہ بنایا جارہا ہے لیکن ان واقعات میں کوئی بھی فرد زخمی یا ہلاک نہیں ہوا تھا۔

بارود کی مدد سے تنصیبات کا اڑانے کے بعض واقعات کی ذمہ داری مبینہ طور زیر زمین کام کرنے والی علیحدگی پسند تنظیم بلوچستان لبریشن آرمی نے قبول کی تھی۔